iklan

EKONOMIA, HEADLINE, MUNISÍPIU, OÉ-CUSSE (RAEOA)

RAEOA prepara ona deliberasaun paga rai afetadu ZEESM

RAEOA prepara ona deliberasaun paga rai afetadu ZEESM

Prezidente Autoridade RAEOA, Arsénio Paixão Bano. Imajen Tatoli/Francisco Sony.

OÉ-CUSSE 07 marsu 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, daudaun ne’e prepara ona deliberasaun ida hodi halo pagamentu ba rai afetadu sira-ne’ebé afetadu hosi mega projetu Zona Ekonómia Espesiál Sosiál Merkadu Timor-Leste (ZEESM-TL) iha Oé-Cusse.

Prezidente Autoridade RAEOA, Arsénio Paixão Bano, informa, rezolusaun ne’e bazea de’it rezolusaun anteriór nian, ne’ebé Governu liuhosi Konsellu Ministru aprova ona ba munisipíu Covalima no Aileu hodi halo pagamentu iha Oé-Cusse.

“Autoridade haree hosi parte legál sira, ezemplu iha Suai ho Aileu, bazea rezolusaun Governu hirak-ne’e, Autoridade RAEOA halo ona deliberasaun atu hahú prosesu pagamentu ba afetadu sira iha mega projetu ZEESM, agora ita-nia ekipa ida lidera hosi Sekretáriu Rejionál Terra Propriedade ba haree ona ezemplu iha Suai, depois sira sei halo enkontru ho Ministériu Justisa, sira fila ita bele hahú ona atu haree dadus sira,” Arsénio Bano, ko’alia iha Oé-Cusse, tersa ne’e.

Autoridade RAEOA diskute ona modelu pagamentu kada tipu bazea iha rezolusaun antes nian, ne’ebé Governu uza iha munisipíu Cokalima no Aileu.

“Iha buat haat mak sei uza hodi selu ba afetadu sira, prosesu preparasaun ba uma troka uma ne’e kuaze to’o finál ona, iha uma tipu tolu, tipu kiik, natoon ho uma boot, uma boot estrada kona rua, uma kiik ne’e iha hitu, restante ne’e uma kiik natoon, ne’ebé modelu BoQ tékniku sira prepara daudaun ona, sei halo uma 107 espesífiku ba afetadu,” nia informa.

Autoridade RAEOA promete iha kouta foun iha suku Taiboko, liuliu iha bairru Bokos no bairru Aes-Ero, suku Lifau, no uma sira-ne’e, sei halo ho dignu no di’akliu ba pozisaun no mós nia rekerimentu ba uma sira-ne’e sei halo hotu inklui asesu ba defisiente sira.

“Kona-bá rai, agora ekipa tékniku sei ba halo peskiza hodi hatene, ba kompensasaun ne’e atu selu oinsá, tanba ita prevee ona nia orsamentu millaun $1,6 ba uma ninian, ita sei gasta besik millaun $2-resin ba uma troka uma, ba konstrusaun ba uma sei liuhosi konkursu públiku ba tenderizasaun (konkursu públiku),” nia afirma.

Nune’e inklui loja no kioske sira, Autoridade oriénta tékniku sira prepara dezeñu, tuir fali mai Autoridade sei bele haree no aprova lisensa atu harii edifísiu seluk, tanba lakoi ema naran harii tenke modelu tanba ne’e iha estrada nasionál nia oin kedas.

“Ita hakarak Oé-Cusse ne’e diferente bele atrai ema li’ur mai, hanesan parte ida ba turizmu entaun ita tenke prepara ita-nia sidade ne’e di’ak, neineik ha’u husu de’it komuniodade nia pasiénsia, kooperasaun hosi rai na’in no uma na’in-sira, maibé ita-nia preparasaun kuaze tama ona ba finalidade, marsu nia laran ne’e ita bele halo ona,” nia katak.

Nia fó-sai katak, pagamentu ne’e sei tuir matadalan antes nian, iha Konsellu Ministru aprova ba Covalima no Aileu.

“Ita labele liu fali Governu Sentrál, ne’ebé ho Suai nia rezolusaun ne’e ita tenki respeita, tanba ne’e Konsellu Ministru mak deside hodi aprova, ita tenke tuir de’it ida-ne’e,” nia katak.

Notísia relevante: RAEOA submete ona proposta rezolusaun ba Governu Sentrál atu indemniza rai afetadu projetu ZEESM

Jornalista   : Abílio Elo Nini
Editór          : Evaristo Soares Martins

iklan
iklan

Leave a Reply

iklan
error: Content is protected !!