OÉ-CUSSE 16 fevereiru 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), submete ona proposta ba Governu Sentrál kona-bá rezolusaun atu indemniza rai komunidade afetadu ne’ebé afeta hosi projetu Zona Ekonómia Espesiál Sosiál Merkadu Timor-Leste (ZEESM-TL).
“Ita aprezenta daudaun ona ba nasionál, ita husu iha rezolusaun ne’e atu halo pagamentu, tanba lei kona-bá títulu rai ne’e iha ona, maibé ita mós tenke prepara ho medida parsela sira-ne’e,” Prezidente Autoridade RAEOA, Arsenio Paixão Bano, ko’alia iha ámbitu diálogu aberta ho komunidade afetadu suku Lifau, Oé-Cusse, kinta ne’e.
Nia husu komunidade atu kolabora, deklara medida rai ho loos no klaru, tanba bainhira rezolusaun to’o autoridade RAEOA kontinua selu ne’e dala-ida, no labele sei sukat fali hodi haloos, esperiénsia ne’e akontese iha terrenu, bainhira ekipa tékniku halo levantamentu dadus iha iha terrenu abitante balu la partisipa tanba ho razaun iha atividade seluk.
“Entaun proposta ba daudaun, ita iha-ne’e mós prepara daudaun, sé proposta ne’e aprova, mai fali atu hahú selu ona, saida mak ita bele halo iha rejiaun la to’o nasionál maka ita selu ai-oan, loja no uma, inklui kapela sira no bee-posu, ne’e autoridade bele halo kedas ba rai, ita sei hein rezolusaun ida hosi Governu Sentrál,” nia afirma.
Nune’e kona-bá atu define valór ba pagamentu rai afetadu iha ZEESM ne’e, ezekutivu la fó-sai tanba desizaun ne’e sei deside hosi reuniaun Konsellu Ministru kona-bá folin pagamentu ba rai afetadu.
“Ita-nia proposta ba Governu SentrÁl mak sei deside iha Konsellu Ministru, iha tinan rua kotuk, sira deside ba Covalima, kada metru kuadraru hetan $3. Ita iha RAEOA ne’e ita hato’o de’it proposta, sei tau $3, ha’u rasik labele inventa valór ne’e,” nia tenik.
Maibé kona-bá fundu pagamentu ne’e, Autoridade orsamenta ona millaun $1-resin, kabe ba pagamentu rai, uma, plantasaun, kioske, rate, bee-posu no seluk tán.
“Agora ita diskute kona-bá hare no batar, kuandu afeta nia valór ne’e oinsá, entaun ha’u sei orienta agrikultura sira, atu diskute asuntu ne’e, depois sei ko’alia ho agrikultór sira kada tinan kolleta ne’e oinsá hetan hira,” nia hateten.
Jornalista: Abílio Elo Nini
Editór: Evaristo Soares Martins
