OÉ-CUSSE, 04 Novembru 2024 (TATOLI) – Komunidade afetada hamutuk 219 konfirma, iha ámbitu diálogu abertu, sira-nia naran iha sede suku Costa molok hetan indemnizasaun, tanba Diresaun Rejionál Terra no Propriedade no Servisu Kadastru (DRTPS) Rejiaun Administrativa Espesiál Oé-Cusse Ambeno (RAEOA) halo ona publikasaun ba mapeamentu rai nian.
Diretór Rejionál Terra no Propriedade no Servisu Kadastru, Júlio Coel, informa katak objetivu husi sorumutu ne’e atu esplika detallu kona-ba prosesu pagamentu, inklui medida no estatutu rai atu konvense abitante sira hafoin hakat ba prosesu pagamentu.
“Konsulta ne’e atu husu sira mai konfirma naran nu’udar afetadu ba alargamentu estrada dezde 2015. Agora, ita prepara atu bá halo pagamentu ba ema 219 iha suku Costa, hahú husi bairru Samoro to’o Mahata”, Júlio Coel hateten ohin.
Notísia relevante: Autoridade RAEOA paga ona rai afetadu iha suku Cunha
Diretór ne’e salienta katak kaléndariu ba pagamentu seidauk klaru, tanba persiza publika lista naran abitante afetadu sira atu verifika sira-nia identidade, nomós balun presiza kompleta dokumentu.
“Loloos pagamentu iha tempu badak, maibé persiza konsulta no taka lista sira-ne’e. Keta balun nia identidade sala karik ou dokumentu tuma presiza kompleta ka rai ne’e sei iha disputa, tenke solusiona mak foin publika kaléndariu pagamentu, tanba orsamentu atu halo pagamentu ba alargamentu estrada iha suku Costa prevee ona rihun $300-resin hodi selu kada metru kuadradu $5”, nia afirma.
Foto/Abílio Elo Nini
Abitante afetadu Vicente Ena husi aldeia Mahata agradese ba Governu tanba bele selu ona sira-nian direitu ba rai, ne’ebé oferese ba Estadu hodi halo konstrusaun estrada iha Oé-Cusse.
“Konsulta ohin ne’e importante, tanba durante ne’e ami rona de’it husi kotuk, maibé ohin ita hotu rona direta katak selu ho dolár 5. Ne’ebé ami prontu no prepara ami-nia dokumentu atu simu indemnizasaun ne’e, maibé tenke selu tuir lei katak metru kuadradu dolár 5”, nia realsa.
Notísia relevante: Autoridade RAEOA valida ata ba indemnizasaun abitante afetadu sira
Xefe suku Costa, Francisco Colo, hateten konsulta públika ne’e importante atu fó oportunidade ba komunidade hodi espresa nia sentimentu, tanba hein tinan barak ona atu hetan indemnizasaun husi Governu.
“Ne’e atu responde direta ba preokupasaun, dúvida. Liuhusi sorumutu entre autoridade no komunidade sei hetan solusaun di’ak, ema hotu bele tau nia hanoin ne’ebé konstrutiva atu hetan desizaun ida justa, tanba komunidade hein tinan barak ona”, nia dehan.
Notísia relevante: Autoridade RAEOA indemniza rai afetadu ba projetu ho kada metru² $5
Prosesu pagamentu ba abitante afetadu ba alargamentu estrada, Servisu Terra no Propriedade bazeia de’it ba deliberasaun foun ne’ebé públika ona iha Jornál Repúblika iha loron 25 Setembru 2024.
Deliberasaun ne’e mak númeru ref. 356/VII/2024, loron-15 fulan-Jullu 2024, alterasaun husi deliberasaun anteriór, uluk selu ho dolár 3 kada metru kuadradu, maibé agora selu ho dolár 5.
Jornalista: Abílio Elo Nini
Editora: Maria Auxiliadora
