iklan

HEADLINE, OEKUSI

Autoridade RAEOA valida ata ba indemnizasaun abitante afetadu sira

Autoridade RAEOA valida ata ba indemnizasaun abitante afetadu sira

Prezidente Autoridade RAEOA, Rogério Lobato, no sekretáriu rejionál sira asina ata deliberasaun ba kompensasaun ba komunidade afetada iha Oé-Cusse. Foto Tatoli/Abílio Elo Nini

OÉ-CUSSE, 19 Agostu 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, no sekretáriu rejionál sira asina, ohin, ata deliberasaun hafoin aprezenta ba Primeiru-Ministru, Xanana Gusmão, atu halo kompensasaun ba komunidade afetada ba projetu Zona Espesiál Ekonomia Sosiál Merkadu iha Oé-Cusse.

“Ami valida ona ata deliberasaun kona-ba rai ne’ebé ita atu halo kompensasaun. Primeiru-ministru konkorda ona ho termu ata nian, ha’u lori mai para sekretáriu rejionál sira asina atu publika iha Jornál Repúblika, depois ita bele marka loron atu selu ona ba rai ne’ebé Estadu okupa liuhusi forsa podér”, Rogério Lobato dehan ba jornalista sira hafoin remata enkontru iha salaun administrasaun Numbei, ohin.

Asinatura ata deliberasaun ne’e taka ba mídia, maibé tuir observasaun jornalista Tatoli, partisipa iha atividade ne’e maioria sekretáriu rejionál sira, falta de’it mak Sekretária Rejionál ba Asuntu Finansa.

Notísia relevante: Povu Atoni husu PM Xanana solusiona rai afetadu sira iha Oé-Cusse

Rogério Lobato lembra katak autoridade RAEOA, liuhusi Servisu Terra no Propriedade halo ona aprosimasaun ho komunidade afetada sira molok halo kompensasaun ba rai ho presu kada métru2 $5.

“Ita tenke halo aprosimasaun ho rai-na’in. Ita tenke negósia ho rai ne’ebé uluk sira-nian, maibé Estadu okupa ho uza de’it forsa no antes ne’e selu ho kada metru2 $3. Agora, ita hasa’e ba $5”, nia afirma.

Prezidente ne’e la esplika detalla kona-ba deliberasaun ne’e, maibé sei publika iha Jornál Repúblika, no kalendáriu pagamentu seidauk fiksa, enkuantu kona-ba orsamentu prevee ona millaun $1-resin.

“Ha’u hakarak lalais, maibé agora ita konsentra ba preparasaun ba Amo Papa, bainhira filafali ami sei buka loron ida atu halo lansamentu liuhusi serimónia ida. Ha’u rasik sei bá konvida primeiru-ministru atu partisipa iha serimónia ne’e”, nia dehan.

Notísia relevante: Autoridade RAEOA indemniza rai afetadu ba projetu ho kada metru² $5

Antes ne’e, Sekretáriu Rejionál ba Asuntu Terra no Propriedade, Marcelino Marques Coro, hateten ekipa téknika rekolla ona abitante afetadu hamutuk 372 mak sei simu indemnizasaun no deliberasaun foun ne’ebé foin prodús vale ba sira-ne’ebé seidauk simu kompensasaun.

“Selu ba abitante 372, husi suku Cunha 111 no suku Costa 261. Ba suku Nípani ho Lalisuk selu ona iha autoridade anterior. Ita selu ba rai ne’e, tanba plantasaun antes ne’e simu ona”, nia dehan.

Marcelino Coro informa mós katak ata deliberasaun ne’e aplika de’it ba sira-ne’ebé seidauk simu kompensasaun ba rai no sira-ne’ebé antes ne’e simu ona sei la simu tan iha legalidade foun ne’e.

“Lei ne’e aplika ba oin, la’ós ba kotuk, ba sira-ne’ebé seidauk selu bele hetan direitu ne’e, maibé kuandu simu ona entaun labele simu tan”, nia afirma.

Notísia relevante: RAEOA prepara ona deliberasaun paga rai afetadu ZEESM

Rekorde katak, iha Marsu 2023, antigu Prezidente Autoridade RAEOA, Arsénio Bano, aprova deliberasaun ida ho númeru 2/2023, loron 24, fulan-Fevereiru ho valór másima kada métru kuadradu selu ho dolár $3.

Jornalista: Abílio Elo Nini

Editora: Maria Auxiliadora

iklan
iklan

Leave a Reply

iklan
error: Content is protected !!