OÉ-CUSSE, 28 Outubru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, segunda ohin, abertura halo pagamantu ba alargamentu rai afetadu hamutuk uma-kain 107 sira iha suku Cunha sub-rejiaun Pante Makasar ho valór kada metru-kuadradu dolár $5.
Rogério Tiago Lobato, hateten, pagamentu ne’e bazea deliberasaun númeru ref. 356/VII/2024, loron-15 fulan-jullu 2024, alterasaun husi deliberasaun anteriór, uluk selu ho dollar $3 kada metru-kuadradu, maibé agora selu ho dolár $5 kada metru-kuadradu hodi kumpre promesa husi Primeiru-ministru Kay Rala Xanana Gusmão.
Notísia relevante:Povu Atoni husu PM Xanana solusiona rai afetadu sira iha Oé-Cusse
Tan ne’e nia husu ba komunidade afetadu sira-ne’ebé simu ona osan kompensasaun ne’e, atu uza ho didi’ak no tuir nesesidade família nian.
“Ami selu atu kumpre promesa ne’ebé Maun-boot Xanana Gusmão bainhira fó pose ba ha’u nu’udar Prezidente Autoridade iha loron 31 janeiru 2024 liubá, katak tenki selu kompensasaun justa ba ema ne’ebé afetadu ba rai sira. Tan ne’e ha’u husu ba imi, koopera ho Estadu, osan ne’ebé ohin simu ona bele utiliza didi’ak ba imi-nia nesesidade,” Lobato hateten, iha sede suku Cunha, ohin.
Tuir nia, durante pagamentu, sidadaun balu la satisfás ho valór orsamentu ka iha fallansu balun liga ho medida rai, bele koordena ho ulun malirin ba servisu Terra no Propriedade, tanba rai nu’udar propriedade komunidade sira-nian tenki hetan nia direitu ho dignu no justa.
“Imi (Komunidade) mak na’in ba rai, ami tenki tama negosiasaun, sé imi konkorda mak ohin ita selu imi direitu, maib éimi lakoi karik, imi la mai simu, ne’ebé ha’u fiar ita hamutuk atu hadi’a rai Oé-Cusse ba oin,” nia fó hanoin.
Notísia relevante:Autoridade RAEOA indemniza rai afetadu ba projetu ho kada metru² $5
Iha fatin hanesan, Diretór Diresaun Rejionál Terra Propriedade no Servisu Kadastro, Júlio Coel, pagamentu ne’e ba de’it alargamentu estrada ne’ebé hala’o iha 2016 to’o 2024, iha suku Cunha 107 ho valór orsamentu hamutuk rihun $25-resin.
“Ohin ema na’in-107 mak simu ona sira-nia direitu. Ohin la’ós ami mai selu de’it maibé liuhusi prosesu, primeiru ami públika mapeamentu, taka sai lista naran afetadu sira, karik balu la satifaz aprezenta reklamasaun no koordena ho tékniku atu hetan esplikasaun, ne’ebé ohin mai selu de’it tanba antes ne’e ita hala’o ona konsultasaun,” nia dehan.
Abílio Asqueli, nu’udar komunidade afetadu suku Cunha, hato’o agradesementu ba Governu, tanba pagamentu dahuluk hala’o husi Governu anteriór selu dolár $3 kada metru-kuadradu maibé agora selu ho dolár $5.
“Ami ohin ne’ebé simu ne’e tanba uluk Governu anteriór selu ho dollár $3, agora selu ho dollar $5 kada metru-kuadradu maibé senti katak maske $5 dolár maibé ida-ne’e ita fó ba Governu atu halo dezenvolvimentu uza ba públiku,” nia orgullu.
Notísia relevante:RAEOA publika mapeamentu ba rai afetadu hodi prepara halo pagamentu
Entretantu, durante pagamentu hala’o iha sede suku Cunha, hetan observasaun husi husi Provedória Direitu Humanu no Justisa (PDHJ) no hetan mó seguránsa husi Polísia Nasionál Timor-Leste (PNTL). No tuir ajenda pagamentu tuir mai seli hala’o suku Costa sub-rejiaun Pante Makasar.
Jornalista: Abílio Elo Nini
Editora: Rafael Ximenes de A. Belo
