OÉ-CUSSE, 23 Outubru 2024 (TATOLI) – Sekretaria Rejionál ba Asuntu Terra no Propriedade no Servisu Kadastru (DRTPSC, sigla portugés) Rejiaun Administrativa Espesiál Oé-Cusse Ambeno (RAEOA) publika ona mapeamentu ba rai afetadu iha fatin tolu hodi prepara halo pagamentu.
Fatin tolu ne’e mak hanesan bairru Postusika, iha suku Lifau, bairru Masin no Sumlili, iha aldeia Oésono, iha suku Costa, sub-rejiaun Pante Makasar, ho totál komunidade hamutuk 31.
Notísia relevante: Autoridade RAEOA indemniza rai afetadu ba projetu ho kada metru² $5
Diretór Terra no Propriedade Oé-Cusse, Júlio Coel, esplika katak publikasaun mapeamentu ba rai afetadu iha Postusika durante loron 90 atu halo reklamasaun no daudaun iha deklarante na’in-lima (5), tanba fatin ne’e destinadu ba investimentu empreza EMG nian. Aleinde ne’e, bairru Masin iha deklarante na’in-20 no Sumlili iha neen no nia publikasaun mapeamentu durante loron 30.
“Objetivu husi públikasaun sira-ne’e atu fó sai ba públiku bele hatene, katak sira mak na’in-loloos ou la’e? Ka rai ne’e sei disputa, sira bele konstesta no halo mós mediasaun no públikasaun ne’e mós atu kompleta dokumentu molok halo pagamentu”, Júlio Coel dehan iha Oé-Cusse.
Nia informa bainhira prosesu pagamentu, Servisu Terra no Propriedade bazeia de’it ba liberasaun foun ne’ebé públika ona iha Jornál Repúblika iha loron 25 Setembru 2024.
Deliberasaun foun ne’e ho númeru ref. 356/VII/2024, loron 15 fulan-Jullu 2024, alterasaun husi deliberasaun anteriór ne’ebé uluk selu ho $3 kada m2, maibé agora selu ho $5.
Diretór Terra no Propriedade ne’e hateten períodu públikasaun hahú loron 18 Outubru to’o 16 Novembru 2024, fó sai dadus kona-ba parsela no lista afetadu kompleta ho identidade na’in ba rai iha fatin tolu mak Postusika, Masin no Sumlili, ne’ebé identifika ona
“Durante publikasaun nia laran, komunidade afetada balun sente rai ne’e la’ós na’in mak señór ka señora ne’ebé naran temi iha lista, bele hato’o reklamasaun inklui dokumentu komprovativu no hatudu evidénsia seluk ba Servisu Terra no Propriedade”, dehan
Notísia relevante: Família 13 iha Oésilo hetan ona indemnizasaun
Jornalista: Abílio Elo Nini
Editora: Maria Auxiliadora
