iklan

HEADLINE, MUNISÍPIU, OÉ-CUSSE (RAEOA)

Autoridade RAEOA sei rekolla dadus afetadu ZEESM atu halo kompensasaun

Autoridade RAEOA sei rekolla dadus afetadu ZEESM atu halo kompensasaun

Sekretáriu Rejionál ba Asuntu Terra no Propriedade RAEOA, Marcelino Marques Coro. Imajen Tatoli/Abílio Elo Nini.

OÉ-CUSSE, 01 abríl 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretaria Rejionál ba Asuntu Terra Propriedade, sei rekolla fali dadus kona-bá komunidade afetadu sira-ne’ebé afeta iha implementasaun grande projetu Zona Ekonomia Espesiál Sosiál Merkadu iha Oé-Cusse atu halo pagamentu.

Sekretériu Rejionál ba Asuntu Terra Propriedade, Marcelino Marques Coro, hateten, komunidade afetadu, ne’ebé afeta ba rai no ai-horis, dezde 2014 to’o 2018.

Abitante afetadu ZEESM hosi suku Costa, José da Cunha. Imajen Tatoli/Abílio Elo Nini.

Kontinuan hosi 2019 mai to’o 2023, barak mak seidauk hetan pagamentu, maske hetan ona levantamentu hosi Sistema Nasionál Kadastru (SNC, sigla portugés).

“Maibé Autoridade anteriór husik hela, tuir ha’u-nia entendimentu no informasaun, pagamentu ba rai afetadu inklui plantasaun hela suku rua, Cunha no Costa, suku Nípani ho Lalisuk halo ona pagamentu, maibé ami seidauk iha dadus ruma, tanba dadus sira la entrega mai ami, atu ita kontinua oinsá,” Sekretériu Rejionál ba Asuntu Terra Propriedade, Marcelino Marques Coro, ba jornalista sira, iha Oé-Cusse, segunda ne’e.

Nia dehan, iha tempu badak sei forma uluk ekipa tékniku ida komposta hosi Sekretária Rejionál Agrikultura no Sekretáriu Rejionál Terra Propriedade atu rekolla fali dadus, hodi halo re-publikasaun.

“Dadus fiksa seidauk iha, ne’e maka ami sei harii ekipa tékniku ida, sei konsulta ho Sekretária Rejionál Agrikultura, bá dadus ai-oan uluk rekolla ona, balu hetan ona pagamentu no balu seidauk, kona-bá rai ami sei halo fali re-publikasaun keta iha reklamasaun ruma, keta balu fa’an ona, balu mate ona karik, ne’ebé prosesu sira-ne’e hotu tenke re-publikasaun mak foin ita hatene,” nia afirma.

Membru Augtoridade ne’e, informa, orsamentu autoridade prevee ona atu halo pagamentu ba rai afetadu inklui plantasaun no fasilidade públiku hanesan bee-posu, rate, no seluk tán.

“Maibé agora iha hela faze preparasaun husi Sekretáriu Rejionál Terra propriedade, haree dadus ne’ebé iha, tanba bainhira ita halo pagamentu, tenke bazea dadus, dadus tenke klaru ho loloos, tanba dadus ne’e uluk rekolla ona, balu to’o agora mate, balu fa’an ona rai no balu troka naran,” nia katak.

“Tan ne’e maka ita sei prepara kondisaun, depois preparasaun hotu ona, foin ita hala’o fali pagamentu, maibé ita sei halo tuir saida mak lei hateten, tenke bazea dadus, publikasaun fó aprovasaun no halo omologasaun iha Rejistu Sivíl Notariadu mak foin ba faze pagamentu,” nia katak.

José da Cunha, nu’udar komunidade afetadu hosi suku Costa, espera, autoridade RAEOA lideradu Prezidente Rogério Tiago Lobato, bele rezolve ona komunidade sira-nia rai, no plantasaun ne’ebé hein tinan barak ona.

“Agora mandatu ba Autoridade RAEOA ne’e ba dala-haat ona, ita espera autoridade foun agora ne’e bele rezolve ona, tanba dezde ZEESM tama 2014 to’o agora ami barak seidauk hetan kompensasaun liuliu rai no no ai-horis,” nia husu.

Entretantu, atu rekorda fali katak, iha mandatu Autoridade anteriór, halo ona pagamentu bazea bá rezolusaun Governu númeru 2/2023, loron 24 fevereiru, ho valór másima, metru-kuadradu másima dollar $3,00.

Baze ba deklarante na’in-1.192, bele aumenta no bele menus tanba iha dentru publikasaun iha karik mosu disputa ruma, nia ho orsamentu ne’e prevee hamutuk millaun $1.6.

Jornalista: Abílio Elo Nini
Editor: Evaristo Soares Martins

iklan
iklan

Leave a Reply

iklan
error: Content is protected !!