Top

Vise-Ministra Ceú Brites enkoraja komunidade Bobometo trata dokumentu komprovativu hodi asesu programa Governu

Vise-Ministra Solidariedade Sosiál no Inkluzaun, Céu Brites. Imajen/TATOLI

OEKUSI 18 Novembru 2026 (TATOLI)—Vise-Ministra Solidaridade Sosiál no Inkluzaun, Ceú Brites enkoraja komunidade Bobometo, Postu Administrativu Oesilo, Rejiaun Espesiál Oekusi Ambeno (RAEOA) atu tau-importánsia ba dokumentu komprovativu hodi asesu ba Governu nia Programa hanesan Pensaun ba Idozu, Bolsa da Mãe no Programa Saúde ba inan isin-rua.

“Problema ida-ne’ebé mak hasoru iha Oekusi, kuaze fatin hotu problema dokumentu, susar hetan Billete Identidade, susar hetan Eleitorál, susar atu hetan Sertidaun Baptizmu, maibé ida prinsipál mak Sertidaun Nasimentu. Ida-ne’e mak vale hotu, ne’e maka ha’u atu dehan ita tenke fó prioridade ba dokumentu sira, ne’e importante,” Vise-Ministra Céu Brites hateten bainhira vizita komunidade iha Suku Bobometo, Postu Administrativu Oesilo, Rejiaun Administrativa Espesiál Oekusi Ambeno (RAEOA), Kuarta ne’e.

Notísia relevante : MSSI realiza atividade fó konsulta saúde ba Abitante iha Suku Bobometo Oekusi

Nune’e, governante ne’e husu bainhira inan ida partu labarik iha uma, tenke fó hatene kedan ba Xefe Suku no tenke fó kedan labarik nia naran, labele husik labarik feto ka mane moris mas naran seidauk iha.

“Tempu husik tempu ba daudaun fulan-ida, tinan-ida, tinan-tolu, tinan-haat tuir loloos labarik ne’e hetan ona nia direitu maibé nia dokumentu laiha, sé mak lakon, la’ós Estadu, labarik sira lakon. Ne’ebé kuandu labarik moris tenke rejistu kedan, hanesan moris iha loron ne’e fó kedan naran ba labele atraza to’o tinan fó tiha naran bá, kuandu imi sente katak naran laloos imi ba dehan hakarak muda nia naran mak ida-ne’e, ita halo dokumentu, halo deklarasaun muda laiha problema mas prinsipál tenke iha dokumentu,” nia fó-hanoin.

Nia rekoñese, kestaun dokumentu ne’e kuaze hasoru iha fatin hotu tanba sidadaun balun laiha vontade atu halo dokumentu.

“Ita rasik laiha prioridade ba ita-nia oan sira-nia dokumentu. Ha’u husu barak tebes, haree trata ona dokumentu ba para labele prejudika imi-nia direitu, kiikoan sira-nia direitu,” nia hato’o.

Iha biban ne’e, Vise-Ministra husu ba populasaun lokál, karik iha família balun ho kondisaun difisiénsia mentál, tenke kuidadu sira hodi informa ba autoridade nune’e Governu liuhusi MSSI bele tau-matan.

“Ha’u husu ba ita hotu, karik iha ita-nia komunidade ita haree ema problema saúde mentál, favór fó hateten Nai Xefe Suku para ita hamutuk serbisu ho saúde atubele lori nia ba konsulta tanba dalabarak saúde mentál ita bele kura. Hanesan ita labele tesi sira, labele tranka sira iha kuartu laran, se ita halo sira hanesan ne’e problema tan ba sira,” nia katak.

Jornalista     : Natalino Costa

Editora          : Julia Chatarina

Publisidade

Leave a Reply

Latest Post

error: Content is protected !!