OÉ-CUSSE 02 marsu 2023 (TATOLI) – Sekretáriu Rejionál ba Asuntu Agrikultura, liuhosi Departamentu Planeamentu Jestaun Agríkola ba Seksaun Peska, planeia harii rompon unidade 15 hodi monta iha sentru peskadór sira iha sub-rejiaun Pante Makasar no Nítibe.
Xefe Departamentu Seksaun Peska iha Diresaun Rejionál Agrikultura, Fernando Fina, informa, Polítika hosi Planeamentu Jestaun Agrikola ba seksaun Peska iha Oé-Cusse, atu fasilita peskadór sira-nia atividade peska fasil bele hetan ikan no aumneta renidmentu.
Nia esplika, daudaun ne’e halo ona planu asaun anuál, liuhosi oinsá atu hamaus ikan, iha 2022 halo ona rompon unidade rua, ida monta iha suku Costa área Oésono, ida monta iha Bokos, suku Taiboko.
“Tinan ne’e mós ami nafatin sei halo unidade rua tán, ida sei monta iha suku Nipani iha sentru peskadór sira iha área Bausiu, ida sei tau iha Oénunu, suku Suni-Ufe, faze tuir mai sei monta tán iha fatin seluk tanba planu hosi diresaun sei harii unidade 15 iha Oé-Cusse, hahú hosi Pante Makasar to’o Nítibe,” Fernando Fina, informa ba jornalista sira iha Oé-Cusse, kinta ne’e.
Nia esplika, rompon unidade rua ne’e harii iha tinan ne’e, daudaun ne’e servisu kompleta ona 100%, bainhira udan-been menus, Diresaun Agrikultura hamutuk ho grupu peskadór sira sei ofisializa hodi hahú halo operasaun.
Tuir nia, polítika ne’e atu fasilita peskadór sira-nia atividade, fasil bele hetan ikan ho tulun mós atu heta rendimentu loron loron.
Nia akresenta, durante ne’e peskadór sira halo atividade maibé tempu naruk mak hetan ikan, agora halo ona planu atu ajuda oinsá bele halibur hamutuk atu kaptura liuhosi polítika ne’e.
“Muda atu kaer no bele hamenus sira-nia kustu tanba durante ne’e sira halo operasaun la’o dook, agora ita halo rompon ne’e atu hafasil sira-nia atividade, tanba ekipamentu sira-ne’e fasilita direita hosi Autoridade RAEOA liuhosi Sekretáriu Rejionál Asuntu Agrikultura,” nia dehan.
Jornalista: Abílio Elo Nini
Editór: Evaristo Soares Martins
