OEKUSI, 23 Juñu (TATOLI) – Autoridade Rejiaun Administrativa Espesiál Oekusi Ambeno (RAEOA), foin mak prevee fundu husi Orsamentu Jerál Estadu (OJE) 2025 nian atu halo konstrusaun foun hodi hadi’a merkadu tradisionál Numbei.
Prezidente Autoridade RAEOA, Rogério Tiago Lobato, informa, antes ne’e negosiante inklui okupante sira hamutuk 146 koopera hodi sobu uluk uma, kioske, animál fatin no seluk tan.
Notísia relevante:Abitante na’in-154 iha merkadu Numbei koopera ho SEATOU sobu rasik sira-nia uma
Tan ne’e, Autoridade mós prepara ona fundu uitoan no sei hein Sekretáriu Estadu Asuntu Toponímia Organizasaun Urbana (SEATOU) kona-ba modelu harii merkadu ne’e.
“Ita iha orsamentu rihun $120, maibé ha’u iha informasaun katak husi Governu Sentrál mós sira prontu atu apoia, tanba ita tenke halo buat ida di’ak, tenke moos no modernu uitoan, nune’e ema iha vontade atu mai sosa sasán,” Rogério Lobato, dehan iha Oekusi, ohin.
Kona-ba dezeñu no konkursu públiku ba prosesu kontrusaun, Autoridade RAEOA sei koordena ho SEATOU inklui Ministériu Komérsiu no Indústria.
“Dezeñu ba merkadu Numbei ne’e seidauk iha, karik SEATOU mai ho dezeñu uma, ita sei koordena ho Diresaun Rejionál Infraestrutura, sira (SEATOU) mai labele halo direita saida mak sira iha, la’e, ne’e rejiaun autonomu espesiál, nune’e sira bele ho sira-nia ideia, ita mós simu, maibé sira tenke tau konsiderasaun ideia husi RAEOA nian, sira mós tenke rona ita,” nia dehan.
Tuir nia kona-ba merkadu provizória antes ne’e, orienta ona Diresaun Rejionál Infraestrutura, hodi lidera ekipa Institutu Jestaun Ekipamentu Apoia Dezenvolvimentu Infraestrutura, Institutu Públiku IGEADI,I.P, halo ateru prepara merkadu provizória, no sei kontinua konstrui mós saneamentu ijiéne hanesan fatin lixu no sintina.
“Merkadu provizória ha’u orienta ona obra públika, sira hahú áteru ona, atu ita-nia vendedór sira uza hodi faan sasán, ne’ebé ita mós sei tau haris fatin, tanba ijiéne ne’e importante,” nia dehan.
Entretantu, tuir dadús ne’ebé ekipa konjunta husi Autoridade RAEOA rekolla totál abitante me’ebé hela iha merkadu Numbei hamutuk 154, ne’ebé antes ne’e, hetan ona notifikasaun no xamada husi Sekretáriu Estadu Asuntu Toponímia no Organizasaun Urbana (SEATOU) atu hamamuk merkadu referidu durante fulan ida, hahú husi loron 24 Marsu to’o 24 Abríl 2025.
Notísia relevante:24 Abríl, SEATOU husu negosiante iha merkadu Numbei-Oekusi hamamuk fatin
Autoridade RAEOA prepara deliberasaun hodi indemniza abitante merkadu Numbei
Jornalista: Abílio Elo Nini
Editór: Florencio Miranda Ximenes
