OEKUSI, 24 Marsu 2025 (TATOLI) – Ekipa konjunta liderada husi Sekretáriu Estadu Asuntu Toponímia no Organizasaun Urbana (SEATOU), segunda ohin, fó ona xamada atensaun ba vendedór sira-ne’ebé halo uma no hela permanente iha merkadu Numbei atu hamamuk fatin hahú ohin loron 24 Marsu to’o 24 Abríl 2025.
Sekretariu Estadu Asuntu Toponímia no Organizasaun Urbana (SEATOU), Germano Santa Brites hato’o nia apelu ofisiál ne’e hafoin hala’o vizita ba iha merkadu Numbei, ne’ebé lokaliza iha suku Costa sub-rejiaun Pante Makasar Rejiaun Administrativa Espesiál Oekusi Ambeno (RAEOA).
Notísia relevante:SEATOU observa merkadu Maumate iha Oé-Cusse laiha kondisaun
“Tinan kotuk, ami mai fó hanoin ona atu sobu rasik, maibé realidade ohin ami mai haree seidauk, tan ne’e ami kontinua fó xamada ho prazu fulan-ida tán, hahú ohin 24 marsu to’o 24 Abríl 2025, uma permanente sira tenke sobu hodi hamamuk fatin ne’e ona tanba faze tuir mai mak eskavatór mak sei sobu kuandu na’in lakohi sobu rasik,” nia apela ba vendedór sira iha merkadu Numbei, ohin.
Tuir nia, tenke hamamuk fatin tanba merkadu ne’e fatin atu faan no sosa, la’os fatin atu halo fali uma permanente hodi hela ho família, haki’ak animál, tan ne’e presiza husik livre, atu ba oin Estadu harii no hadi’a fali merkadu ne’e didi’ak, nune’e ema hotu uza ho dignu no servi ba ema hotu atu livre faan no sosa sasán.
Notísia relevante:Governu sei hasai negosiante ne’ebé hela iha mekadu Numbei Oé-Cusse
Tanba ne’e, Governante ne’e, fó ona orientasaun ba ekipa konjunta husi Autoridade RAEOA, komposta husi terra propriedade, Sekretáriu Rejionál Administrasaun, parte agrikultura atu hamutuk ho Autoridade lokál sira kontinua identifika sidadaun ne’ebé hela iha rai Estadu hodi halo uma permanente tenke notifika no to’o fulan-Abríl tenke hamamuk ona fatin.
“Tan ne’e husu sidadaun atu koopera hodi sobu rasik sira-ne’ebé harii uma ona iha rai Estadu, obra públika nia servisu sei haree no identtifika, maibé pasiénsia tanba dezpeza administrativa SEATOU mak halo sei laiha kompensasaun ruma,” nia apela.
Iha fatin hanesan, Sekretáriu Rejionál ba Asuntu Administrasaun, André La’o, promete iha tempu badak sei kria enkontru ho ekipa konjunta, nune’e iha inisíu fulan-Abríl bele hatuun ona notifikasaun.
“Ami simu ona rekomendasaun tanba prazu fulan-ida de’it, entaun ami sei tuur hamutuk ho ekipa konjunta husi terra no propriedade, agrikultura ho obra públika, atu identifika vendedór sira-ne’ebé halo uma permanente ne’e atu notifika, to’o agora ita seidauk hatene dadús tan ne’e mak ekipa sei mai identifika hodi notifika mak ita foin hatene, uma hira mak atu sobu bele akontese iha inisíu fulan-Abríl ne’e,” nia hateten.
Entretantu, Xefe Suku Costa, Fransisco Colo, relata iha tinan kotuk autoridade lokál suku Costa hala’o ona enkontru ho negosiante sira, maibé to’o agora seidauk identifika uma-kain hira mak hetan afetadu.
“Tinan kotuk ami hala’o dialogu aberta iha sede katak labele kontinua halo uma permanente iha espasu públiku, maibé barak mak lakohi koopera entaun autoridade lokál labele hadi’a merkadu ne’e, maibé husu mós ekipa konjunta atu identifika didi’ak tanba ami mós seidauk identifika uma hira mak presiza sobu,” nia hateten.
Notísia relevante:SEATOU partilla matadalan atu organiza área urbana iha Oé-Cusse
SEATOU alerta iha Oé-Cusse ‘labele halo uma permanente iha rai Estadu’
Jornalista: Abílio Elo Nini
Editór: Florencio Miranda Ximenes
