OÉ-CUSSE, 26 juñu 2024 (TATOLI) – Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, kuarta ne’e partilla lei no dekretru-lei lima kona-ba matadalan atu organiza área urbana sai moos no furak ba entidade sira iha Rejiaun Administrativa Espesiál Oé-Cusse Ambeno (RAEOA).
Baze ba matadalan sira-ne’e nu’udar programa SEATOU nian hanesan, lei númeru 3/2024, kona-ba ijiene no orden públika, dekretu-lei númeru 51/2016, kona-ba lisensiamentu mensajen publisidade, dekretu-lei númeru 29/2016 kona-ba toponímia no numerasaun polísia, dekretu-lei númeru 3/2016, kona-ba estasionamentu, dekretu-lei númeru 2/2016, kona-bá residu sólidu urbana.
Notísia relevante: SEATOU sei forma ekipa kontrola utilizasaun espasu públiku iha Ambeno
“Lei sira-ne’e hanesan matadalan hodi organiza sidade urbana sira iha territóriu inklui Oé-Cusse, tanba ita sosializa papél ami-nian, bazea lei no dekretu lei sira-ne’e hetan alterasaun, nune’e populasaun no autoridade sira iha Oé-Cusse atu komprende, ba futuru implementa iha terrenu karik, sira bele hatene hela serbisu ne’e,” nia ko’alia iha salaun aadministrasaun Numbei, Oé-Cusse.
Daudaun ne’e SEATOU koordena ona ho Autoridade RAEOA, atu estabelese ekipa konjunta ida, nune’e bele kontrola utilizaun espasu públiku iha Oé-Cusse.
“Ohin ha’u orienta ona ba semana tuir mai, tenke prepara ona ekipa konjunta ida, depois públika iha públiku Oé-Cusse, katak prezensa ekipa SEATOU ho autoridade RAEOA, atu hadi’a duni sidade, la’ós iha Oé-Cusse laran de’it maibé ba to’o mós iha sub-rejiaun sira, presiza tebes ita-nia tulun to’o iha-ne’ebá, atu fahe informasaun ba sira nune’e sira bele kuidadu ita-nia sidade rasik,” nia akresenta.
Sekretáriu Rejionál ba Asuntu Administrasaun, André Lao, reprezenta Prezidente Autoridade RAEOA agradese no promete atu koopera atu hadi’a Oé-Cusse kona-ba utilizaun espasu públiku.
“Hanesan Autoridade RAEOA ami nakloke simu programa Governu nian atu implementa iha Oé-Cusse, ami agradese tanba sensibilizasaun ne’e importante populasaun Oé-Cusse, atu intende didi’ak kna’ar no serbisu ne’ebé SEATOU atu halo iha Oé-Cusse ba tempu tuir mai,” nia agradese.
Jornalista: Abílio Elo Nini
Editór: Evaristo Soares Martins
