Top

Ekipa Saúde halo rastreiu uma-bá-uma hodi deteta sedu moras TB iha Maliana

Pesoál Saúde Sentru Saúde Komunitária Maliana foti hela amostra me’ar-tasak komunidade ne'ebé suspeita ba moras tuberkuloze. Foto/SSK Maliana.

MALIANA, 18 Novembru 2026 – Sentru Saúde Komunitária (SSK) Maliana hala’o hela atividade Sweeping Screening ka rastreiu ba moras tuberkuloze (TB), iha postu administrativu Maliana, munisípiu Bobonaru, hodi deteta sedu kazu TB no prevene tranzmisaun moras ne’e iha komunidade.

Xefe Sentru Saúde Komunitária Maliana, Nascimento Mau Leto, hatete katak atividade ne’e hahú ona iha semana kotuk liubá ho apoiu orsamentu husi Fundu Globál liuhusi nivel nasionál.

Nia esplika katak pesoál saúde ekipa tolu kada loron halo vizita husi uma-bá-uma iha aldeia sira, hodi identifika ema ne’ebé iha sintoma mear no foti amostra mear atu lori bá laboratóriu hodi halo análize.

Atividade ne’e Nascimento konfirma katak kobre aldeia 39 ne’ebé eziste iha postu administrativu Maliana.

“Ami sei tama sai uma hotu. Loron rua liubá, sesta ho segunda, halo tiha ona iha aldeia neen, ohin aldeia tolu tan hamutuk aldeia sia, falta aldeia 30. Ami foti suspeitu sira nia mear-tasak, ami tama uma-uma husu dehan iha ne’e ema mear iha ka la’e? Se iha ami foti sira-nia kabeen tasak”, nia informa ba Tatoli, iha kna’ar-fatin, tersa-feira ne’e.

Pesoál Saúde Sentru Saúde Komunitária Maliana foti hela amostra me’ar-tasak komunidade ne’ebé suspeita ba moras tuberkuloze. Foto/SSK Maliana.

Nascimento salienta katak liuhusi atividade Sweeping Screening ne’e, ekipa saúde hakarak deteta sedu ema ne’ebé suspeita moras TB, atu bele hetan tratamentu lalais no hamenus risku tranzmisaun iha família, aldeia, suku no munisípiu tomak.

Nia mós husu ba komunidade atu koopera ho pesoál saúde sira ne’ebé hala’o vizita iha sira-nia uma, liuliu ema ne’ebé iha sintoma me’ar atu fó amostra me’ar ba ekipa saúde hodi lori bá laboratóriu.

“Ami halo sweeping ida-ne’e hakarak redús moras tuberkuloze iha Maliana laran, tanba moras TB ne’e da’et. Ohin loron ema ida moras, nia sei da’et ba ema na’in-10 no sei ba tan. Ho ida-ne’e mak ita halo prevensaun para moras ne’e labele iha família, aldeia, suku, postu no munisípiu Bobonaru”, nia enfatiza.

Aleinde halo Sweeping Screening ba TB, ekipa Sentru saúde Komunitária Maliana mós distribui abate ba komunidade atu tau iha tanke, bidón no balde sira ne’ebé rai bee, hodi prevene moras dengue, liuliu iha tempu udan ne’ebé susuk aumenta.

Tuir dadus husi Sentru Saúde Komunitária Maliana, hahú husi Janeiru 2026 to’o agora, rejista ona kazu TB hamutuk 118, kompostu husi kazu 84 konfirmadu baktéria no kazu 34 ho diagnóstiku klíniku.

Notísia relevante: Rejiaun Sudeste Aziátiku OMS kompromete sei reforsa asaun kontra TB iha TL

Jornalista: Sergio da Cruz

Editora: Maria Auxiliadora

 

Publisidade

Leave a Reply

Latest Post

error: Content is protected !!