OÉ-CUSSE, 25 juñu 2024 (TATOLI) – Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, tersa ne’e hala’o enkontru kortejia ho Prezidente Autoridadae Rejiaun Administrativa Espesiál Oé-Cusse Ambeno (RAEOA), Rogério Tiago Lobato, atu estabelese ekipa konjunta ida hodi kontrola utilizasaun rai Estadu no espasu públiku iha territóriu rejiaun ne’e.
“Ha’u mai vizita kortejia ho Prezidente Autoridade atu fahe esperiénsia serbisu Toponímia nian ba Autoridade atubele kumpriende no hatene lala’ok serbisu iha terrenu, tanba dekretu-lei sira-ne’ebé implementa iha Dili no munisipíu hanesan,” governante ne’e ba jornalista sira hafoin enkontru.
Notísia relevante: Governu sei hasai negosiante ne’ebé hela iha mekadu Numbei Oé-Cusse
Antes ne’e SEATOU hala’o ona identifikasaun ba fatin públiku sira iha merkadu tradisionál Tono, Numbei inklui estrada públiku sira.
“Ita sei habelar informasaun ba autoridade lokál sira, depois ita sei harii ekipa konjunta ida iha Oé-Cusse, nune’e ekipa ne’e mak bele hala’o serbisu ba kraik, Oé-Cusse mak tenke serbisu duni ba rai Oé-Cusse, atu hatuur no bele kompriende lei ne’e,” nia afirma.
Nia dehan, Prezidente RAEOA nu’udar autoridade másima, maibé atu serbisu ba rai Oé-Cusse, ne’e só Oé-Cusse oan sira mak tenke haka’as-aan, atu hadi’a rai rasik, no tenke hamutuk fó liman ba malu, hotu-hotu tenke haka’as-aan, nune’e serbisu ne’e bele la’o di’ak nune’e komunidade sira bele hetan benefísiu husi independénsia ne’e.
“Ha’u hanoin rai Estadu, entaun Estadu nian, ita povu uza ona, kuandu Estadu presiza ita tenke hatene aan, husik entrega ba Estadu atu halo dezenvolvimentu, la’ós to’o tempu ida Estadu presiza nia rai, ita ko’alia hasoru Estadu no Governu, kontra fali Estadu no Estadu nia dignidade laiha,” nia dehan.
Notísia relevante:PM Xanana husu ekipa SEATOU serbisu tuir lei no kompeténsia
Tuir SEATOU, daudaun seidauk simu keixa no rekomendasaun husi RAEOA kona-bá uttilizasaun espasu públiku liuliu rai Estadu, tán ne’e enkontru ne’e atu rona de’it, primeiru atu rona uluk, maibé kuandu iha duni informasaun populasaun balu okupa rai Estadu, hakarak ka lakohi ita tenke ko’alia ho sira, atu koopera ho Estadu, kuandu bainhira Estadu presiza rai sira-ne’e, tenke entrega ba Estadu atu halo dezenvolvimentu iha Oé-Cusse rasik.
“Kuandu ita la koopera ho Estadu no Governu ladún di’ak, hanesan sidadaun di’ak ita haka’as-aan luta ba ukun rasik-aan, agora ita tenke haka’as atu hadi’a ita-nia rain rasik, labele fiar metin ba ema seluk maibé Oe-Cusse tenke hamutuk,” nia fó hanoin.
Prezidente Autoridade RAEOA, Rogério Tiago Lobato, agradese ba SEATOU bele vizita Oé-Cusse atu partilla serbisu Governu nian iha nível rejiaun.
“Autoridade apoia totál ba serbisu SEATOU, nia halo buat di’ak, oras ne’e ema la fó valór, maibé loron ida ema sei rekoñese nia serbisu ho esforsu,” nia orgullu.
Notísia relevante: SEATOU aprezenta rezultadu servisu kona-ba medida organizasaun Urbana ba KM
Rekorda fali katak, iha loron 27 dezembru 2023, Sekretaria Estadu Asuntu Toponímia no Organizasaun Urbana (SEATOU), identifika ona atu sei hasai obrigatóriu negosiante sira-neʼebé hela no fa’an sasán iha merkadu públiku Numbei, bazea dekretu-lei númeru 33/2008, loron 27, fulan-agostu, ne’ebé bandu negosiánte sira fa’an iha espasu públiku.
Merkadu tradisionál Numbei, lokaliza iha aldeia Sanane, suku Costa, sub-rejiau Pante Makasar, RAEΟΑ.
Notísia relevante: FOTO ATUÁL: SEATOU hasoru malu PAM RAEOA atu estabelese ekipa konjunta
Jornalista: Abílio Elo Nini
Editór: Evaristo Soares Martins
