Top

SEATOU aprezenta rezultadu servisu kona-ba medida organizasaun Urbana ba KM

Sekretáriu Estadu Asuntu Toponomia Organizasaun Urbana-MAE, Germano Santa Brites Dias, akompaña hosi ekipa Jestaun Merkadu PNTL, F-FDTL no mós Intitusaun relevante sira sobu no hasai komunidade sira ne’ebé durante ne’e okupa espasu públiku iha Bidau Santana Dili, kinta (18 abríl 2024). Imajen Tatoli/Francisco Sony

DILI, 30 abríl 2024 (TATOLI)– Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, tersa ne’e, aprezenta ba Konsellu Ministru (KM) kona-ba rezultadu servisu medida organizasaun urbana ne’ebé daudaun ne’e la’o hela, ho objetivu atu transforma Dili sai ambiente ne’ebé moos, organizadu, saudavel no seguru.

“Sekretáriu Estadu halo rezumu ida kona-ba kompeténsia no orientasaun ne’ebé simu no aprezenta dadus kona-ba despeju administrativu sira ne’ebé daudaun ne’e la’o hela iha área oin-oin sidade nian, ho objetivu atu hamenus risku inundasaun, poluisaun no dezorganizasaun urbana, nune’e mós posibilita hodi hala’o obra públika sira, hanesan loke-tan estrada urbana, konstrui jardín no reabilita terminál Bekora,” refere nota imprensa ne’ebé Agência TATOLI asesu husi mídia Gabinete Primeiru Ministru, tersa ne’e.

Notísia relevante: PR Horta triste SEATOU halo eviksaun la kria kondisaun

Imajen/espesial

Presiza hatene mós katak, populasaun sira antes ne’e hetan ona notifikasaun no kompensasaun husi Governu anteriór ba despeju sira ne’ebé agora halo ona.

Iha aprezentasaun ne’e ko’alia mós kona-ba konstrusaun semitériu públiku Metinaru no reabilitasaun Merkadu Manleuana no Taibesi, ne’ebé sei hadi’a kondisaun, hodi organiza no aumenta kapasidade merkadu boot rua sidade Dili nian, no mós fornese ambiente ida ne’ebé funsionál no saudavel liu ba sidadaun sira.

Notísia relevante: Taur fó sentidu solidaridade ba sidadaun afeta ba evikasaun

SETAOU halo ona despeju administrativu ba komunidade sira ne’ebe okupa rai Estadu hanesan Merkadu Sengol iha Bidau, Merkadu Comoro, vendedór iha Ai-mutin, komunidade balun iha Bidau ne’ebe okupa ka harii uma iha trotóar leten, Komunidade iha Metiaut no tuir planu aban (kuarta 01 Maiu) halo tan despeju administrativa ba komunidade hamutuk 185 iha Tasi-Tolu.

Entretantu, ekipa konjunta ezekuta serbisu bazeia ba dekretu-lei númeru 3/2024 17 janeiru, alterasaun dahuluk dekretu-lei númeru 33/2008 27 agostu, kona-ba ijiene no orden públiku. Nune’e mós, iha dekretu-lei númeru 51/2016 28 dezembru kona-ba lisensiamentu mesajen publisitária, no dekretu-lei númeru 2/2017 22 marsu kona-ba sistema jestaun reziduu sólidu urbanu, inklui dekretu-lei númeru 3/2017 22 marsu kona-ba rejime zona estasionamentu durasaun limitada.

Notísia relevante Bankada Governu apresia serbisu SEATOU, opozisaun husu kria kondisaun

Jornalista: Hortencio Sanchez

Editór: Florencio Miranda Ximenes

Publisidade

Leave a Reply

Latest Post

error: Content is protected !!