Top

Prezidente Repúblika simu karta kredensiál husi Embaixadór naun rezidensiál 12

Prezidente Repúblika, José Ramos-Horta simu karta kredensiál husi designadu Embaixadór husi (Nao-Rezidente husi nasaun 13. iha Palásiu Prezidensiál, Bairru-Pité, kuarta (18/11/2026). Imajén TATOLI/Egas Cristóvão

DILI, 18 Novembru 2026 (TATOLI)—Prezidente Repúblika, José Ramos-Horta, kuarta ne’e, simu karta kredensiál husi Embaixadór naun rezidensiál 12, iha Palásiu Prezidensiál Nicolau Lobato, Bairru Pite, Dili.

Diretór Nasionál ba Asuntu Europa no Áfrika, Ministériu Negósiu Estranjeiru no Kooperasaun (MNEK), Jesuino de Oliveira Alves, hateten embaixadór sira-ne’e akredita mai Timor-Leste maibé sira hela iha nasaun sira-ne’ebé besik ho Timor-Leste.

“Ohin, Prezidente Repúblika simu karta kredensiál husi Embaixadór naun rezidensiál 12, signifika sira akredita mai Timor-Leste maibé sira hela iha nasaun sira-ne’ebé besik ho ita. Sira balun antes ne’e estabelese ona kooperasaun ho ita, maibé balun foun hanesan Sri Lanka, Nikaragua no seluk tan, sira foin primeiru akredita sira nia Embaixada iha ne’e,” Jesuino de Oliveira Alves hateten ba jornalista sira, kuarta ne’e.

Nia hatutan, embaIxadór ida-idak halo reuniaun ho Prezidente Repúblika no hatudu sira-nia vontade atu hametin liután kooperasaun diplomátika ho Timor-Leste.

“Sira ida-ida reunian ho Prezidente, sira hotu hatudu sira-nia vontade atu hametin liutan kooperasaun diplomátika ho ita, sira-ne’ebé foun hakarak esplora kooperasaun ho ita iha área ekonomia no seluk tan,” nia esplika.

Ba Timor-Leste, esperansa ba embaIxadór sira-ne’e mak oinsá hametin liután relasaun di’ak ne’ebé iha ona.

“Ita-nia esperansa ba sira oinsÁ hametin liutan relasaun di’ak ho ita, ezemplu hanesan Nikaragua ne’e relasaun di’ak tebes ho ita iha kedan ita-nia restaura ita-nia independénsia no kooperasaun estabelese ona iha 2007 maibé foin akredita sira-nia Embaixadór ohin,” nia dehan.

Embaixadór naun Rezidensiál ne’ebé entrega karta kredensiál mak hanesan Embaixadór husi nasaun Áustria, Fiji, Guatemala, Izraél, Lituánia, Mongólia, Nikaragua, Polónia, Qatar, Repúblika Checa, Sri Lanka no Suiza.

Jornalista : Hortêncio Sanchez

Editór        : Cancio Ximenes

Publisidade

Leave a Reply

Latest Post

error: Content is protected !!