iklan

EKONOMIA, HEADLINE, MUNISÍPIU, OÉ-CUSSE (RAEOA)

SEATOU alerta iha Oé-Cusse ‘labele halo uma permanente iha rai Estadu’

SEATOU alerta iha Oé-Cusse ‘labele halo uma permanente iha rai Estadu’

Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, kuarta ne’e observa merkadu tradisionál Maumate ne’e iha suku Naimeko, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA). Imajen Tatoli/Abílio Elo Nini.

OÉ-CUSSE 26 juñu 2024 (TATOLI) – Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, husu ba komunide sira iha Rejiaun Administrativa Espesiál Oé-Cusse Ambeno (RAEOA), atu labele halo uma no loke kioske permanente iha rai Estadu, tanba iha futuru Governu sei presiza atu halo dezenvolvimentu nasaun nian.

 Notísia relevante: SEATOU partilla matadalan atu organiza área urbana iha Oé-Cusse

Governante ne’e hato’o nia apelu ne’e, bainhira hala’o vizita ba merkadu tradisionál Tono no vizita mós fatin lixeira iha suku Lifau, kuarta ne’e.

“Sira-ne’ebé hela espasu públiku rai Estadu, iha merkadu laran, ami koordena ona ho Autoridade RAEOA atu fó-sai aviza ba komunidade sira tanba rai ne’ebé uza ba merkadu, ba ema hotu uza hodi fa’an no sosa la’os hela permanente, atu sai fali na’in ba rai ida,” Germano Santa Brites Dias, hateten.

Tuir nia, lei la autoriza ba komunidade atu hela no toba iha merkadu atu fa’an no sosa, maibé loron bele fa’an no kalan bele taka fila ba uma aban mak mai kontinua, konsidera merkadu ne’e hanesan eskritóriu liuliu ba vendedór sira nune’e bele halo tranzasaun iha laran.

“Tan ne’e komunidade sira labele mai halo uma no kioske permanente iha arreadór merkadu, atu sai fali na’in ba iha merkadu laran, sei sente la’ós ita-nian, di’akliu lalika halo sasán permanente iha laran, maibé halo provizória, iha futuru atu  labele difikulta bainhira Governu atu halo alarga tán merkadu ne’e karik, entaun lalika ejize ba Governu atu halo indemnizasaun ba uma sira-ne’e, se lae ulun moras, tan ne’e husu ba ekipa atu kontrola situasaun sira-ne’e, labele halo uma permanente, tanba merkadu ne’e fa’an no sosa, la’ós merkadu atu hela ho família,” nia konklui.

 Jornalista: Abílio Elo Nini

Editór: Evaristo Soares Martins  

iklan
iklan

Leave a Reply

iklan
error: Content is protected !!