OÉ-CUSSE, 26 juñu 2024 (TATOLI) – Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, kuarta ne’e observa merkadu tradisionál Merkadu Maumate ne’e iha suku Naimeko, sub-rejiaun Pante Makasar Rejiaun Administrativa Espesiál Oé-Cusse Ambeno (RAEOA) laiha kondisaun dignu tanba laiha fasilidade, hanesan eletrisidade, sintina atu fasilita negosiánte sira hodi fa’an ho seguru.
“Atu hateten loloos de’it, merkadu ne’e nia kondisaun ladún di’ak, ita haree nia fasilidade laiha duni, iha de’it barak uma oan ida, ne’e uza atu fa’an sasán de’it, no kazadebañu aat hela, tán ne’e mak ita hanoin hela atu hato’o ba Autoridade RAEOA, bele prepara orsamentu atu hadi’a,” Germano Santa Brites Dias, hafoin hala’o vizita iha merkadu Maumate, Oé-Cusse.
Governante ne’e fó hanoin, ba Autoridade RAEOA, presiza buka dalan hodi hetan fundu mai husi Vise-Primeiru Ministériu Dezenvolvimentu Rurál no Abitasaun Sosiál, liuliu ba sintina públiku, no bele mós hato’o programa ne’e MTCI, atu mai haree direita, nune’e povu bele uza ho dignu ba atividade merkadu nian.
“Ita haree ona nia kondisaun ba futuru administrasaun RAEOA bele hanoin atu tau osan, atu hadi’a nia kondisaun atu akumula vendedór sira mai husi suku 18 mai konsentra iha-ne’e sira mós bele hetan fasilidade di’ak, liuliu ba hariis-fatin, sintina, ahi, atu sira bele uza ho di’ak, tanba povu atu fa’an sasán tenke iha fasilidade,” nia husu.
Notísia relevante: SEATOU partilla matadalan atu organiza área urbana iha Oé-Cusse
Hatán ba problema kona-bá fasilidade Prezidente Autoridade RAEOA, Rogério Tiago Lobato, , konsidera merkadu tradisionál importante atu apoia fasilidade nu’udar sentru sirkulasaun ekonomia iha baze.
“Ita tenke kria kondisaun nune’e ema bele fa’an sasán ho dignu no moos, tanba sasán ne’ebé iha hola iha merkadu te’in ba haan, ha’u haree ona merkadu balu laiha sintina, laiha bee-moos, entaun Autoridade sei haree asuntu ne’e, Ami buka hela fundu, atu halo merkadu foun ne’e lalais, tanba ne’e mós ligasaun ho saúde públika,” nia hateten.
Notísia relevante: SEATOU sei forma ekipa kontrola utilizasaun espasu públiku iha Ambeno
Entretantu, durante vizita ofisiál ne’e, akompaña mós husi Membru Autoridade RAEOA hanesan Sekretáriu Rejionál ba Asuntu Terra no Propriedade, Sekretáriu Rejionál ba Asuntu Administrasaun, Sekretáriu Rejionál ba Asuntu Agrikultura, jestór merkadu no autoridade lokál sira.
Notísia relevante: SEATOU alerta iha Oé-Cusse ‘labele halo uma permanente iha rai Estadu’
Jornalista: Abílio Elo Nini
Editór: Evaristo Soares Martins
