OEKUSI, 18 Juñu (TATOLI)–Autoridade Rejiaun Administrativa Espesiál Oekusi Ambeno (RAEOA) liuhusi Sekretáriu Rejionál ba Asuntu Terra no Propriedade, sei prepara deliberasaun ida, nu’udar matadalan atu halo kompensasaun ba família vítima ne’ebé hetan despezu administrativu iha merkadu Numbei.
“Ita seidauk aloka orsamentu ba kompensasaun nian, tanba sei mai ho estimasaun ne’ebé klaru, liuliu ba uma sira, daudaun sei rekolla husi Diresaun Rejionál Infraestrutura, depois tékniku sira sei haree, orsamentu hira mak presiza halo kompensasaun, maibé molok ita selu autoridade sei prepara matadalan ida liuhusi deliberasaun autoridade nian mak foin selu, tanba ne’e osan Estadu nian, ita tenke selu bazea lei ruma. Ita sei selu ita tinan ne’e no bele 2026, tanba depende preparasaun liuliu dadús rekollamentu,” Sekretáriu Rejionál ba Asuntu Terra no Propriedade, Marcelino Marques Coro, hateten iha Oekusi, ohin.
Notísia relevante:Abitante na’in-154 iha merkadu Numbei koopera ho SEATOU sobu rasik sira-nia uma
Dadús ne’ebé daudaun rekolla husi ekipa konjuntu komposta husi Diresaun Rejionál Komérsiu no Indústria, Diresaun Rejionál Infraestrutura, Terra Propriedade ho Diresaun Agrikultura, ba abitante ne’ebé hela iha merkadu Numbei hamutuk 146, rekollamentu dadús seidauk finál tanba iha uma-kain balun seidauk sai no lakohi koopera.
Tanba ne’e, sira-ne’ebé lakohi koopera no kontinua hela no faan sasán iha áreadór merkadu Numbei, Autoridade RAEOA sei komunika nafatin atu kumpre tanba maioria koopera ona hodi sobu rasik sira-nia uma.
“Xamada no notifikasaun ekipa konjunta aplika hahú husi loron 24 Marsu to’o loron 24 Abril 2026, maibé liu tiha to’o Juñu agora ne’e mak, ita fó notifikasaun entaun karik lakohi koopera, Estadu kontinua hala’o nia polítika tanba ema barak koopera ona tanba saida mak uma rua tolu lakohi?,” nia informa.
Notísia relevante:Autoridade RAEOA prepara fatin ba merkadu provizóriu
Entretantu, antes ne’e, Jestór Merkadu Numbei, Jestór merkadu Numbei, Fernando de Sousa, dehan, nu’udar venededór ne’ebé hela dezde 2005.
Nia rekomenda ba Governu liuliu Autoridade RAEOA no SEATOU, atu konsidera patrimóniu sira-ne’ebé komunidade sira konstrui ona hanesan uma, ai-oan no seluk tan atu fó indemnizasaun.
“Ami apresia ho planu Governu atu halo dezenvolvimentu, ami apoia atu hadi’a fatin ne’e sai di’ak, tanba ita observa nia kondisaun ladun di’ak, balun faan no la faan mós hela hotu iha ne’e, entaun imajén ladun di’ak, tan ne’e mak ami hot-hotu konkorda hodi koopera, di’akliu ami sobu rasik duke Governu mai lori exavatór estraga tiha kalén, ai no ba jaringan agora ita rasik haree, ema barak sai ona ba buka fatin atu hela, importante labele haluha presiza konsidera uma no plantasaun sira-ne’ebé sei estragu,” nia orgullu.
Jornalista: Abílio Elo Nini
Editór: Florencio Miranda Ximenes
