OEKUSI, 17 Juñu (TATOLI) – Autoridade Rejiaun Administrativa Espesiál Oekusi Ambeno (RAEOA), daudaun ne’e prepara ona merkadu provizóriu no kompleta kedas ho postu sanitaria ba komersiante Merkadu Numbei iha terminál antigu Numbei, suku Costa, sub-rejiaun Pante Makasar.
“Ohin ami mai haree fatin ne’e, ita prepara atu aloka ita-nia komersiánte sira mai iha ne’e, molok SEATOU mai atu hamutuk ho Autoridade RAEOA organiza merkadu foun,” Rogério Lobato ba jornalista sira, hafoin observa progresu servisu merkadu provizória iha, Numbei, ohin.
Notísia relevante:Abitante na’in-154 iha merkadu Numbei koopera ho SEATOU sobu rasik sira-nia uma
Ekipa konjunta komposta husi Diresaun Rejionál Infraestruta (DRI), Diresaun Rejionál Agrikultura, Diresaun Rejionál Komérsiu no Indústria no Terra Propriedade, ko’alia ona ho komersiánte sira no koopera di’ak loos.
“Governu mós sei tau matan, ba uma no plantasaun ne’ebé sira hela atu fó indemnizasaun, maibé ne’e parte terra propriedade no diresaun infraestrutura mak sei haree,” nia informa.
Iha fatin hanesan, Diretór Diresaun Rejionál Infraestrutura (DRI), Remigío Nuno Sila, hateten merkadu ne’e ezekuta husi Institutu Jestaun Ekipamentu Apoia Dezenvolvimentu Infraestrutura, Institutu Públiku IGEADI,I.P, bainhira konklui ona mak foin tama konstrusaun hosi instala postu sanitaria, hanesan sintina no lisu fatin, inklui baraka ba komérsiante sira.
Notísia relevante:24 Abríl, SEATOU husu negosiante iha merkadu Numbei-Oekusi hamamuk fatin
“Ita prepara ona proposta atu hato’o ba Prezidente Autoridad atu oinsa atendimentu urjente atu harii sintina no lixu fatin no mós baraka atu tau sasán hodi faan, tanba ema barak sei mai konsentra iha ne’e, entaun ijiéne ne’e importante,” nia informa.
Entretantu, tuir dadús ne’ebé ekipa konjunta husi Autoridade RAEOA rekolla totál abitante me’ebé hela iha merkadu Numbei hamutuk 154, ne’ebé antes ne’e, hetan ona notifikasaun no xamada husi Sekretáriu Estadu Asuntu Toponímia no Organizasaun Urbana (SEATOU) atu hamamuk merkadu referidu durante fulan ida, hahú husi loron 24 Marsu to’o 24 Abríl 2025.
Notísia relevante:PA RAEOA: presiza kria kondisaun molok hasai negosiante iha merkadu Numbei
Jornalista: Abílio Elo Nini
Editór: Florencio Miranda Ximenes
