OEKUSI, 03 Abríl 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, hateten, nia sei koordena ho Sekretáriu Estadu Asuntu Toponímia Organizasaun Urbana (SEATOU) atu kria uluk kondisaun, nune’e bele muda negosiánte sira bá fatin ida dignu hodi bele kontinua faan sira-nia sasán.
“Sira (SEATOU) sei koordena ho ha’u, ha’u sente katak, ne’e inisiátiva di’ak, ita labele haree de’it, buat ne’ebé SEATOU halo ne’e aat hotu, maibé iha haree Dili agora fatin balun luan , sei ita hadi’a sidade Dili ne’e, ita tenke hola medida, dalaruma ema la gosta no la simu, maibé sei ita la hola medida, Dili ne’e sidade oinsá, agora iha Oekusi, klaru sira sei mai ko’alia ho ha’u atu bainhira bá halo intervensaun iha merkadu ne’e mós, halo ho di’ak tanba ha’u buka ona fatin ida, molok halo intervensaun, primeiru ema sira-ne’e tenke muda ba fatin ida, atu kontinua faan sira-nia sasán, ita tenke haree uluk kondisaun ka prepara fatin ba sira antes ita haruka sira sai,” nia dehan iha Oekusi, ohin.
Notísia relevante:SEATOU kontinua sosializa dekretu-lei ijiene no orden públika iha Oekusi
Tuir nia, bainhira hadi’a hotu tiha merkadu tradisionál ne’e (Numbei), sei sai investimentu ida atu halo merkadu foun ida sai ijieniku, entaun ema sira-ne’ebé uluk hela iha merkadu, bele fila-fali mai okupa sira-nia fatin, maibé iha fatin ida-ne’e di’ak no seguru atu bele faan sasán ho dignidade liuliu faan ho ijiene.
“Ida-ne’e katak, faan sasán ne’e labele tau de’it iha rai, tenke tau iha fatin ida-ne’ebé di’ak, ne’ebé SEATOU mai iha ne’e, ami sei koordena atu halo servisu ne’e di’ak, la’ós atu duni de’it ita-nia populasuan sira,” nia afirma.
Nia informa, katak kona-ba fatin provizória, antes ne’e Autoridade RAEOA identifika ona fatin iha 01 Maiu Palaban besik tasi-ibun
“Iha fulan tolu ba kotuk, ami haree ona fatin iha 01 Maiu Palaban baibain halao seremónia isar bandeira ne’e, ne’ebé kuandu SEATOU atu mai, sira sei ko’alia ho ha’u, depois ita halo mudansa pasifika, ko’alia ho ema hotu, ema simu, tanba fatin barak okupa ne’e rai Estadu, sei ita atu halo merkadu ida modernu no moos, ita tenke uza Estadu nia rai, ne’ebé ha’u fiar sira mai iha ne’e ho intensaun di’ak la’ós mai atu sobu buat arbiru de’it,” nia dehan.
Tanba ne’e, nia promete tempu badak nia sei koordena ho Sekretáriu Rejionál Asuntu Terra Propriedade no Sekretáriu Rejionál Administrasaun, atu promove diálogu uluk ho negosiánte sira iha merkadu Numbei, tanba presiza halo notifikasuan ofisiál molok hamamuk fatin ne’e.
“Ha’u sei ko’alia ho Sekretáriu Rejionál Terra Propriedade no administrasaun, atu tuun ba ko’alia ho negosiante sira, la’os ba ne’e duni de’it sira, la’e, ba ko’alia dehan, ami hakarak hadi’a fatin ne’e sai di’ak, moos no modernu itoan, tanba ema ne’ebé atu sosa sasán ne’e labele tau iha rai, depois kuandu muda sai, aban bairua sira mai fali sira-nia fatin, tanba ami sei rejista hotu sira-nia naran, semak okupa fatin iha merkadu, sei fila fali atu hela hodi faan sasán,” naia dehan.
Notísia relevante:SEATOU observa merkadu Maumate iha Oé-Cusse laiha kondisaun
Entretantu antes ne’e iha loron 24 Marsu 2025, ekipa konjunta liderada husi Sekretáriu Estadu Asuntu Toponímia no Organizasaun Urbana (SEATOU), fó ona xamada atensaun ba vendedór sira-ne’ebé halo uma no hela permanenti iha merkadu Numbei, katak hahú ohin loron ne’e 24 Marsu to’o loron 24 Abríl 2025 tenki hamamuk ona fatin..
Merkadu ne’e fatin atu faan no sosa, la’os fatin atu halo fali uma permanenti hodi hela ho família, haki’ak animál, tan ne’e presiza husik livre, atu ba oin Estadu harii no hadi’a fali merkadu ne’e didi’ak, atu ema hotu uza ho dignu no servi ba ema hotu atu livre faan no sosa sasán.
Notísia relevante:24 Abríl, SEATOU husu negosiante iha merkadu Numbei-Oekusi hamamuk fatin
Jornalista: Abílio Elo Nini
Editór: Florencio Miranda Ximenes
