OÉ-CUSSE, 27 dezembru 2023 (TATOLI) – Sekretaria Estadu Asuntu Toponímia no Organizasaun Urbana (SEATOU), kuarta ne’e, halo sensibilizasaun ba implementasaun dekretu-lei númeru 33/2008, loron 27, fulan Agostu, kona-bá ijiene no ordén públiku ba entidade sira sira iha Rejiaun Administrativa Espesiál Oé-Cusse Ambeno (RAEOA).
Notísia relevante:AMB orienta konsellu suku muda fahi-luhan iha fatin públiku
Sekretáriu Estadu Asuntu Toponímia no Organizasuan Urbana, Germano Santa Brites Dias, informa, objetivu hosi sensibilizasaun ne’e, atu fó hanoin ba entidade sira liuliu autoridade komunitáriu sira, kona-bá oinsá atu kuida lixu no ambiente iha tempu udan.
Nune’e mós fó esplikasaun kona-bá dekretu-lei númeru 33/2008, loron 27, fulan agostu, ne’ebé bandu negosiante sira fa’an iha espasu públiku iha Oé-Cusse Ambeno.
“Xefe suku no jestór sira, bele hatene servisu Toponímia ne’e tún to’o kraik, tán ne’e maka ohin ami ko’alia mós ho liña ministeriál sira, no fó hanoin barakliu ba xefe suku sira, fó hela orden servisu ba sira kona-bá dekretu-lei 33/2008, bele aplika iha komunidade nia leet, nune’e komunidade bele kumpri no banati tuir bá, tanba lei ne’e ita foin implementa 20%,” Germano Santa Brites Dias, ba jornalista sira iha salaun administrasaun Numbei Oé-Cusse.
Sekretáriu Rejionál ba Asuntu Administrasaun, Martinho Abani Elo, agradese ba Governu Sentrál, tanba bele halo sensibilizasuan ba autoridade lokál sira iha RAEOA.
“Ami fiar sensibilizasaun ne’e bele haforsa liután, liña koordenasaun entre RAEOA ho Governu Sentrál, tanba durante ne’e ita mós hala’o ona hanesan dekretu-lei kódigu estrada aplika iha área urbana, maibé agradese ba SEATOU, mai sosializa tán lei ne’e ba xefe suku sira atu ita hamutuk kuida ita-nia ambíente,” nia katak.
Notísia relevante:SEATOU bandu hakoi mate-isin besik uma
Entretantu, partisipa iha atividade sensibilizasaun ne’e maihosi xefe suku 18, jestór sub-rejiaun haat, PNTL no kargu xefia sira iha Oé-Cusse Ambeno.
Jornalista: Abílio Elo Nini
Editór: Evaristo Soares Martins
