AMB orienta konsellu suku muda fahi-luhan iha fatin públiku
MALIANA, 04 outubru 2023 (TATOLI)-Autoridade Munisipál Bobonaro (AMB) hasai ona sirkular ho karáter urjénsia ba administradór postu sira hodi orienta membru konsellu suku sira atu muda fali luhan sira ne’ebé harii iha fatin públiku sira ho objetivu atu halo kapitál Maliana sai moos.
Sekretáriu Autoridade Munisípiu Bobonaro, João de Fátima do Carmo, esplika, sirkulár ne’e autoridade munisipál Bobonaro hasai bazea ba orientasaun hosi Ministru Administrasaun Estatál, Tomás do Rosário Cabral.
Adjuntu Prezidente Autoridade Munisípiu Bobonaro ne’e subliña, atu kumpre ba dekretu lei númeru 33/2008 27 agustu kona-ba dekretu lei ijiene orden públika.
Notísia Relevante:SEATOU husu Autoridade Bobonaro organiza funsionáriu hamoos fo’er kapitál Maliana
“Ita-nia sirkulár ne’e katak, molok tama ba 28 novembru, loja sira Maliana ne’e tenke pinta halo kapás, uma sira tenke rápidu, limpeza hotu uma ninin, labele halo fali fahi luhan iha uma-oin, liuliu besik kedas fatin públiku, ita sei hare ida,kuandu hela ona iha fatin públiku fahi luhan ne’e halo iha kotuk, depois tenke ho kondisaun, fase halo moos, halo nia sitina soe fo’er fatin,” nia hateten iha Jináziu Maliana, kinta ne’e.
Sirkulár ne’e sita katak hahú fulan novembru komunidade hotu-hotu iha Bobonaro tenke dada-sae bandeira nasionál iha idak-idak nia uma-oin hodi komemora loron proklamasaun independénsia tinan ne’e.
“Bandeira ne’e ita hasa’e atu valoriza ita nia erói sira-ne’ebé mate ba rai ida-ne’e, entaun ha’u husu labele hasa’e badak oan de’it,” nia fó hanoin.
Notísia relevante: Komunidade labele husik animál iha kampu aviasaun Ritabou
Jornalista: Sérgio da Cruz
Editór: Evaristo Soares Martins
