iklan

EKONOMIA, BOBONARO, HEADLINE, MUNISÍPIU

SEATOU husu Autoridade Bobonaro organiza funsionáriu hamoos fo’er kapitál Maliana

SEATOU husu Autoridade Bobonaro organiza funsionáriu hamoos fo’er kapitál Maliana

Sekretáriu Estadu Asuntu Toponímia no Organizasaun Urbana, Germano Santa Brites Dias, partila hela informasaun kona-ba ijiene orden públika, lei númeru 33/2008 ba autoridade munisípiu Bobonaro. Imajen Tatoli/Sérgio da Cruz.

MALIANA, 27 setembru 2023 (TATOLI) – Sekretáriu Estadu Asuntu Toponímia no Organizasaun Urbana, Germano Santa Brites Dias, husu ba autoridade munisípiu Bobonaro atu organiza funsionáriu públiku sira kada sesta halo limpeza jerál hodi hamoos foer ka lixu sira iha kapitál Maliana.

Nia hato’o asuntu ne’e durante halo enkontru no partilla  lei númeru 33/2008, 27 agostu kona-bá iijene orden públika ba autoridade munisípiu Bobonaro, kargu xefia no lideransa komunitária sira.

Tuir nia, iha tempu Indonézia, Maliana koñesidu ho Bersih Aman Rapih Indah Sehat (BARIS), agora funsionáriu no komunidade hotu tenke servisu maka’as atu hatuur nafatin istória ne’e, tanba jardín no fatin públiku sira iha Maliana uluk matak, agora laiha hotu ona.

“Ha’u husu ba Prezidente Autoridade, orienta funsionáriu sira sesta-sesta tenke tún hamoos valeta no sesta dadeer ne’e tenke servisu iha merkadu, hamoos lixu sira tau iha fatin, atu ema mai haree furak oituan, sidade ne’e kabeer duni, udan mai mós ita la moras, tanba ne’e ita tenke haka’as-aan,  Maliana ne’e hanesan odamatan boot,” nia hato’o asuntu ne’e iha salaun administrasaun munisípál Bobonaro, kuarta ne’e.

Nia husu ba Servisu Munisipál Turizmu no Jestaun Merkadu atu koordena ho administradór postu no Servisu Munisipál Ambiente atu partilla informasaun ba komunidade sira labele husik animál fahi no karau iha fatin públiku sira hanesan, merkadu no edifísiu públiku sira.

Governante ne’e mós husu atu bele haree no kontrola negosiante sira-ne’ebé okupa espasu públiku hodi fa’an sasán iha merkadu Maliana no merkadu iha postu administrativu sira seluk inklui sira-ne’ebé harii barak ki’ik iha dalan-ninin.

“Sira bele fa’an iha li’ur, maibé tenke uza tenda movél, tanba se lae sira fila husik hela ai sira halo rungu-ranga, ne’e ita hare ladún di’ak ida,” nia fó hanoin.

Prezidente Autoridade Munisipál Bobonaro, Ernesto de Oliveira, hateten servisu balu hanesan muda negosiante sira okupa espasu públiku iha postu administrativu Bobonaro la’o ona no sei kontinua ba merkadu sira seluk.

“Ha’u husu ba administradór postu, xefe suku sira, ita labele hein de’it sua eselénsia, nia ema ida de’it, entaun ita mak nia liman-ain iha baze, habelar informasaun atu komunidade sira bele komprende,” nia katak.

Administradór postu administrativu Balibó, Amilcar Tavares, kompromete bainhira fila sei aplika orientasaun ne’e ba komunidade no negosiante iha Balibó.

“Ami-nia jardín di’ak ona, merkadu mós di’ak, só ke iha animál mak ladún organiza didi’ak, ha’u fila agora enkontru ho sira atu hadi’ak kedas. Ha’u fiar ho baze legál ami kaer ona ne’e, animál sira-ne’e ita bele haruka sulan hotu,” Amilcar afirma.

Notísia relevante: Administradór postu sei koordena ho entidade relevante atu muda merkadu Bobonaro

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!