Administradór postu sei koordena ho entidade relevante atu muda merkadu Bobonaro
BOBONARO,11 agostu 2022 (TATOLI)-Administradór postu administrativu Bobonaro, munisípiu Bobonaro, Juvinal Leto-Mau dos Santos, sei koordena ho lideransa komuntária sira atu foti desizaun hamutuk hodi muda merkadu Bobonaro Vila ba fatin seluk tanba kondisaun atuál grave.
Enkuantu iha tempu liubá nia parte iha hanoin ida, atu halo konstrusaun ba merkadu foun, maibé susar oituan atu konkretiza hanoin no mehi ne’e, tanba bainhira muda sai de’it merkadu ne’e ba konstrui fali iha fatin seluk dalaruma negosiante sira la konkorda.
Notísia relevante: Kondisaun merkadu Bobonaro Vila grave
“Hau sei ba halo enkontru ho líder komunitária, lia-na’in, veteran, komunidade, negosiante sira hodi nune’e bele deside hamutuk, labele ha’u de’it mak deside, nune’e loron ikus liderensa komunitária sira lebele dehan merkadu aat ne’e ita bele sobu, halo foun fali lae mosu problema, ha’u hanoin ida-ne’e mós ladún di’ak ida,” nia ko’alia iha Maliana, kinta ne’e.
Tuir nia, bainhira atu implementa dezenvolvimentu iha fatin ne’ebé de’it, planu hotu labele hosi nível-leten mak hatún mai, maibé di’akliu hosi kraik mak aprezenta atu nune’e bele korresponde ho preokupasaun ne’ebé komunidade sira enfrenta
Nia reforsa, autoridade postu hakarak muda ba fatin seluk tanba atuál iha merkadu refere kuaze at totál, kauza hosi akontese udan-boot, hodi rezulta rai halai estraga totál uma ne’ebé governu reabilita dezde 2004.
“Agora merkadu ne’e hanesan ita ba karik, simente balun iha fali okos, balun iha fali leten, fatin negosiante sira tula modo buat sira seluk, ai-fuan sira-ne’e mos haliis hotu, tanba rai iha okos la metin entaun halai hotu kedas,” nia hateten.
Autóridade postu ne’e promote, ba oin bainhira hetan ona desizaun hosi entidade sira iha postu Bobonaro mak sei prepara planu atu submete ba prezidente autóridade munisípiu, nune’e bele tau iha planu prioridade ba Programa Dezenvolvimentu Integradu Munisipál (PDIM) tinan fiskál 2023.
Tuir dadaus CVRS períodu II (1 jullu to’o 31 dezembru 2018) Diresaun Estatístika munisípiu Bobonaro iha aldeia 192, suku 50, postu administrativu neen ho totál populasaun 114,537, komposta hosi mane 57,462, feto 57,075 ho totál Uma-kain 24,591.
Notísia relevante: Autoridade Bobonaro hatama ona merkadu Mau-Mali iha PDIM 2023
Jornalista: Sérgio da Cruz
Editór: Evaristo Soares Martins
