BOBONARO, 03 agostu 2022 (TATOLI) – Kondisaun merkadu iha postu administrativu Bobonaro, munisípiu Bobonaro grave, tanba aliserse merkadu ne’e nakfera no kle’uk ona.
Negosiante Bendita dos Santos preukupa ho kondisaun ai-rin infrastrutura merkadu sentrál postu administrativu Bobonaro Vila ne’ebé daudaun ne’e hahú kle’uk no nakfera ona.
Nia haktuir, merkadu refere konstrui dezde okupasaun Indonézia no hafoin Timor-leste restaura nia independénsia governu antérior konsege halo reabilitasaun iha tinan 2004 hodi sai fatin sentru ba atividade negósiu komunidade suku 18.
Maibé iha 2019 liubá akontese udan-boot halo rai halai rezulta aliserse uma ne’e nakfera hotu, ikus mai ai-rin merkadu ne’e halai kle’uk hotu no la aguenta ona atu leba kalen no ai iha kakuluk leten.
Notísia relevante: Autoridade Bobonaro propoin PDIM 11 iha OJE 2023
“Ami ta’uk loos, kuandu tempu udan la tuur fa’an sasan iha-ne’e, tanba ami ta’uk uma ne’e monu, tanba ai-rin sira-ne’e kleuk hotu ona, meza sira-ne’e mós nakfera hotu kedas,” nia imforma ba Tatoli, iha merkadu Bobonaro Vila, kuarta ne’e.
Bendita subliña, iha bazár loron (sábadu) tenke hasai hotu modo no sasán sira ba fa’an fali iha estrada ninin, tanba ho kondisaun infraestrutra la seguru ne’e halo kompradór lakoi tama sosa sasán iha merkadu laran.
“Ema tama mai ida ka rua hanesan ne’e de’it, modo tahan sira-ne’e maran, namlaek, dodok soe hotu, dalaruma loron ida ami atu hetan de’it $10 mós susar la halimar,” nia dehan.
Iha fatin hanesan, komunidade Domingos Cristovão, husu ba governu sentrál no autoridade munisípiu Bobonaro, atu prioritiza merkadu ne’e iha Planu Integradu Dezenvolvimentu Munisipál (PIDM) 2023, tanba kondisaun merkadu ne’e la seguru.
“Ami ta’uk mak rai nakdoko ne’e, sé ida-ne’e mak akontese monu hotu kedas, tanba ai-rin sira- ne’e lahuk no nakfera hotu ona,” nia akresenta.
“Bee laiha, ami atu rega modo nian ne’e lao ba kuru iha Mali-Lait, tanba besi sira tún mai ne’e bee la sai hotu, dalaruma sai mais ita hein to’o kleur mak foin kuru masa ida no rua hanesan ne’e,” nia haktuir.
Tuir dadus CVRS períodu II (1 jullu to’o 31 dezembru 2018) Diresaun Estatístika munisípiu Bobonaro iha aldeia 192, suku 50, postu administrativu neen, ho totál populasaun 114,537 kompostu hosi mane 57,462, feto 57,075, ho totál uma-kain 24,591.
Notísia relevante: OJE 2022, Bobonaro ezekuta ona 43%
Jornalista : Sérgio da Cruz
Editór : Evaristo Soares Martins
