BOBONARO, 10 juñu 2022 (TATOLI) – Prezidente Autoridade Munisípiu Bobonaro, Ernesto de Oliveira Barreto, prepara ona proposta Projetu Dezenvolvimentu Integradu Munisipál (PDIM) hamutuk 11 ba Orsamentu Jerál Estadu (OJE) tinan fiskál 2023.
Prezidente Autoridade Munisípiu Bobonaro, Ernesto de Oliveira Barreto, esplika proposta hirak- ne’e lideransa komunitária sira mak aprezenta prioridade rasik, lori ba ta’is iha postu administrativu sira, hafoin diskute iha konsellu koordenasaun munisipál hodi hetan aprovasaun.
Iha prosesu diskusaun ne’e proposta mai hosi baze balun la tau prioridade iha tinan ne’e, maibé sei kontinua aprezenta iha tinan oin nune’e implementa iha 2024.
“Ami ta’is hotu ona haree katak, PDIM 11 ne’e mak prioridade liu,” Prezidente Autoridade Munisípiu Bobonaro, Ernesto de Oliveira Barreto, ko’alia iha Maliana, sesta ne’e.
Nune’e Autoridade Bobonaro lideradu Ernesto de Oliveira sei aprezenta ba Ministériu Administrasaun Estatál (MAE) iha loron 15 fulan-juñu tinan 2022.
Setór água no saneamentu
Autoridade Bobonaro propoin prioritiza setór água no saneamentu konstrusaun sistema gravitasaun bee-moos ba aldeia Raifu foho, suku Raifun, postu administrativu Maliana, ho nia estimasaun kustu $148,293.00.
Nune’e mós konstrusaun sistema gravitasaun bee-moos iha aldeia Oelaca, Boutál iha suku Deudet, postu administrativu Lolotoe ho kustu $132,000,00.
Konstrusaun no instalasaun bomba eletrikál hosi bee-matan Biagrou ba aldeia Aidabaleten foho, suku Aidabaleten, postu administrativu Atabae ho kustu $194,069,00.
Setór edukasaun
Iha setór edukasaun sei halo rekonstrusaun sala aula tolu iha Ensinu Báziku Sentrál (EBC, sigla portugés) Samutaben, suku Manapa, postu administrativu Cailaco ho totál kustu estimasaun $125,000.00.
Setór saúde
Sei halo konstrusaun uma maternidade iha sentru saúde Maliana ho totál kustu $125.000,00, konstrusaun postu saúde no rezidénsia pesoál saúde suku Ai-asa, postu administrativu Bobonaro ho kustu estimasaun $205,000,00.
Setór agrikultura
Sei halo konstrusaun ba merkadu Marco, postu administrativu Cailaco ho kustu estimasaun ho montante $125.000,00.
Setór seguransa
Autoridade Bobonaro propoin halo konstrusaun ba edifísiu bombeiru postu Batugade ho kustu estimasaun $120,000.00, konstrusaun eskuadra Polísia Nasionál Timor-Leste (PNTL) Batugade $120,000.00.
Nune’e mós halo reablitasaun terminál Tunbibi, suku Tapo-Memu, postu administrativu Maliana, hodi kompleta fasilidade iha merkadu Mau-Mali, aldeia Samelaun, suku Ritabou, postu administrativu Maliana.
“Projetu Merkadu Mau-Mali ho terminál Tunubibi ne’e konselu kordenasaun munispál foin aprova liuhosi diskusaun naruk ida, troka fali ho projetu sira seluk, agora tékniku sira sei prepara hela dezeñu no BOQ nune’e tempu badak bele finaliza,” Prezidente Autoridade Munisípiu Bobonaro, Ernesto de Oliveira Barreto subliña.
Jornalista : Sérgio da Cruz
Editór : Evaristo Soares Martins
