BOBONARO, 14 jullu 2022 (TATOLI) – Sekretáriu Autoridade Munisípiu Bobonaro, João Fátima do Carmo, informa ezekusaun Orsamentu Jerál Estadu (OJE) tinan fiskál 2022 munisípiu Bobonaro ezekuta ona 43% ekivalénsia ho $1,983,406,72 iha trimestre daruak.
“Ita-nia ezekusaun ne’e tuir loloos atinje ona 48% hosi totál orsamentu ne’ebé aprova $4,727,883.00, maibé tanba de’it aumenta tán orsamentu Programa Mão de Obra Postu Administratrativu (PMOPA) $698,497,98, entaun ita-nia persentajen tún fali ba 43% tanba osan aumenta,” nia imforma ba Jornalista sira iha Maliana, kinta ne’e.
Hosi montante $4,727,883.00 ezekusaun orsamentu tuir kategoria saláriu no vensimentu atinje ona 44% ekivalénsia ho $691,908,77, Bens (Sasán) no Servsiu 32% ekivalénsia ho $284,451,73.
Nune’e mós kapitál dezenvolvimentu 30% ekivalénsia ho osan $98,680.97, transferénsia públika atinje ona 35% ekivalensia ho osan $908,365 no kapital menór $40,000,00.
Hosi orsamentu jerál estadu 2022 autoridade munisípiu Bobonaro ne’e sei finansia ba Programa 11, sub programa 34 no atividade 71 kobre hotu serbisu munisipál sira, maibé Diresaun Servisu Munisipál Rejistu Notariadu nio Servisu Kadastru mak ninia ezekusaun foin atinje 5,1%.
“Razaun tanba primeiru tanba ita-nia baze legál numeru 54/2020 ne’ebé hetan alterasaun,entaun kompeténsia ne’ebé domíniu ba munisípiu ba serbisu rua ne’e, temporariamente sei apoia hosi governu sentrál, ne’ebé sira kabas sorin governu lokál no kabas sorin governu sentrál hela, nune’e difikulta sira-nia ezekusaun,” nia esplika.
Adjuntu Prezidente Autoridade Munisípiu Bobonaro ne’e afirma, ba oin Ministru Administrasaun Estatál, Miguel Perreira de Carvalho, hamutuk Ministru Justisa haree hela asuntu ne’e atu rezolve nune’e implementa podér lokál diresaun rua ne’e bele entrega ona ba autoridade munisípiu.
Nia akresenta, munisípiu sei esforsu halo avaliasaun ba diresaun servisu munisipál sira-ne’ebé mak ninia taxa ezekuasaun sei menus, nune’e bele aselera ezekusaun iha trimestre datoluk liga ba programa no sub-programa ne’ebé aprovadu ona iha planu asaun anuál.
Notísia relevante: Governu aloka rihun $698-resin implementa PMOPA iha Bobonaro
Jornalista : Sérgio da Cruz
Editór : Evaristo Soares Martins
