BOBONARO, 13 outubru 2022 (TATOLI) — Administradór postu administrativu Maliana (APA), munisípiu Bobonaro, Tomás Laco-Loe, husu komunidade sira atu labele husik animál iha kampu aviasaun ne’ebé lokaliza iha área Kodim, suku Ritabou tanba impede transportasaun pasiente ho urjénsia ba Hospital Nacional Guido Valadares (HNGV), Dili.
Notísia relevante: HRM rejista pasiente na’in-15 mate iha trimestre daruak
“Ita-nia komunidade sira-ne’ebé laiha konsiénsia kesi fali animál mak nakonu iha kampu ida-ne’e, ne’ebé kuandu ita-nia maluk sira moras urjente, aviaun atu foti ne’e susar tebes,” nia informa jornalista sira iha kampu aviasaun Maliana, kinta ne’e.
Daudaun ne’e administradór postu Maliana, funsionáriu sira, xefe suku Ritabou, Maximiano dos Santos Araújo, hamutuk ho traballadór Programa Mão de Obra Postu Administrativu (PMOPA) hala’o limpeza jerál ba arreadór kampu aviasaun.
Laco-Loe esklarese razaun hili kampu aviasaun implementa programa ne’e, tanba atu fasilita ambulánsia Hospitál Referál Maliana, transporta pasiente ruma ho urjénsia ba kapitál nasaun, Dili.
“Agora ha’u seidauk iha planu, kuandu hamoos moos ona ami sei hasai hotu animál sira-ne’ebé kesi iha kampu ida-ne’e. Agora ami sei kria kondisaun depois sosializa ba komunidade sira atu labele kesi animál iha-ne’e,” nia katak.
Xefe suku Ritabou, Maximiano dos Santos Araújo, informa, taballadór grupu ida hamutuk na’in-20 mak hamoos kampu aviasaun ne’e.
‘Objetivu ita tau grupu ida iha kampu aviasaun, tanba du’ut nakonu, entaun iha ko’alia ho administradór atubele hamoos tiha, tanba kampu aviasaun ne’e du’ut naruk ita-nia komunidade kontinua laiha konsiénsia kesi animál iha laran,” xefe suku ne’e haktuir.
Tuir observasaun Agência Tatoli iha terrenu nota katak, lutu rede ne’ebé futu haleu kampu ne’e balun ema deskoñesidu estraga hotu ona, no odamatan iha portaun boot entrada nian moos la funsiona ona nune’e animál, ema lao-ain, no motorizada karreta movimenta livre.
Tuir dadus suku Ritabou, iha aldeia 12 ho totál populasaun 7.881 hosi totál xefe família 1,600-resin.
Notísia relevante: SNAEM, I.P fó formasaun atendimentu emerjénsia ba ekipa ambulánsia HRM
Jornalista : Sérgio da Cruz
Edtór : Evaristo Soares Martins
