BOBONARU, 29 jullu 2021 (TATOLI)-Servisu Nasionál Ambulánsia no Emerjénsia Médika, Institutu Publiku (SNAEM, I.P sigla portugés) fó formasaun oinsá hatán emerjénsia saúde públika ba ekipa ambulánsia ospitál referál Maliana (HRM, sigla portugés) munisípiu Bobonaru.
Diretór Servisu Nasionál Ambulánsia no Emerjénsia Médika, Horacio Sarmento da Costa, informa objetivu hosi formasaun ne’e eleva koñesimentu funsionáriu ambulánsia sira-nian, oinsá bele halo atendimentu emerjénsia ba situasaun kalamidade no sira seluk ligadu ho saúde públika.
“Formasaun ne’e hanesan preparasaun ida oinsá mak responde ba situasaun sira emerjénsia, ami mos formasaun oinsá mak monta tenda iha situasaun emerjénsia nia laran”, katak nia ba jornalista sira iha HRM, kinta ne’e.
SNAEM,I.P mos distribui tenda médika ba emerjénsia nian tolu ne’ebé hetan apoiu hosi Organizasaun Mundiál ba Saúde (OMS) hodi instala iha HRM no fatin sira seluk ne’ebé presiza atendimentu emerjénsia, liu-liu utiliza ba triajen iha fatin izolamentu sira durante períodu COVID-19.
Diretór ne’e mos esplika, maske SNAEM,I.P hamrik mesak ona hanesan I.P iha loron 7 janeiru, maibé sei hasoru difuldade iha rekursu umanu, ekipamentu hodi apoiu servisu. Mesmu nune’e, nia afirma nafatin esforsu nu’udar servidor Estadu nafatin fó asisténsia médika ba sidadaun hotu ne’ebé presiza atendimentu emerjénsia.
“Ba oin ita sei halo rekrutamentu ba médiku, enfermeiru no motorista ambulánsia, nune’e aumenta forsa traballu. Ami mos planu sei sosa tan ekipamemtu ne’ebé presiza atu hatán lalais komunidade nian preokupasaun”, esplika.
SNAEM, I.P iha diresaun nasionál operasaun no departamentu médika, durante eziste hetan ona apoia ekipamentu médiku; aimoruk no fasilidade seluk tan hosi OMS hodi fasilita servisu atendimentu saúde públika iha fatin hothotu.
Diretór ne’e hateten, durante observasaun iha HFM, ekipa ambulánsia laiha fatin apropriadu. Tanba ne’e ba futuru SNAEM,I.P mos planu koordena ho autoridade munisipál Bobonaru, nune’e bele fó espasu atu harii ofisina SNAEM,I.P no prepara fatin estasionamentu ambulánsia iha munisipiu Bobonaru.
Funsionáriu SNEAM,I.P iha Bobonaru hamutuk na’in lima kompostu hosi enfermeiru na’in rua no motorista ambulánsia na’in tolu.
Jornalista : Sérgio da Cruz
Editor : Cipriano Colo
