SEATOU bandu hakoi mate-isin besik uma
MALIANA, 27 setembru 2023 (TATOLI) – Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, bandu komunidade hotu iha territóriu nasionál katak bainhira família ruma mate hakoi besik resintu uma nian.
Notísia Relevante:SEATOU konvense abitante Caicoli aseita muda fahi 23 ba sira-nia munisípiu
“Bandu mate labele hakoi iha uma ninin, kotuk no uma oin,” nia informa asuntu ne’e bainhira hala’o enkontru ho lideransa autoridade munisípiu Bobonaro, kargu xefia no autoridade lokál sira, iha salaun administrasaun munisípál Bobonaro, kuarta ne’e.
Sekretáriu Estadu Asuntu Toponímia no Organizasaun Urbana hato’o asuntu ne’e bazea ba dekretu lei númeru 33/2008, loron 27 agostu, kona-bá ijiene orden públika, tanba hakoi mate isin besik mate uma bele afeta ba ema moris nia saúde.
“Sira saúde mak hatene liu katak ita kuandu hakoi mate iha uma oin ka kotuk, ne’e moras iha, tanba kuandu ita konsumu bee ka ai-haan ruma bele fó moras, entaun ita tenke atensaun ba ida-ne’e,” nia afirma.
SEATOU mós planu sei hasai ka muda hotu rate sira besik uma hodi ba haloot iha semitériu públiku.
Nia dehan, planu ne’e fiksa ona rate sira iha semitériu públiku sei mai ho dezeñu ida de’it ne’ebé modelu atu hanesan ho semitériu sira ba erói pátria.
“Ita halo ida-ne’e atu evita ita-nia maluk sira balu halo rate andár, tau tán uma iha-ne’ebá, solda tán besi. Ha’u fó ezemplu iha Dili ita hanesan hanesan sidade rua, sidade loron nian ida ita la’o, kalan nia ida ba matebian sira, uluk ita la’o iha rate ta’uk, tanba nakukun, maibé agora lae,” nia hateten.
Nia subliña, bainhira área ne’e laiha fatin atu ba hakoi laiha entaun Governu iha obrigasaun atu identika rai esaádu ruma hodi halo semitériu públiku.
“Ba sira-ne’ebé hakoi iha semitériu sira iha suku ne’e, sira atu halo modelu halon usá, ne’e buat ketak ida, ita atu hadi’ak ida semitériu públiku ne’e,” nia hateten.
Ezekutivu ne’e afirma, hakarak ka lakoi iha fulan-dezembru semitériu públiku iha Dili sei muda ba Metinaro tanba espasu iha semitériu Santa Cruz no Bekusi laiha espasu.
Nia fó hanoin ona ba Prezidente Autoridade no Administradór Munisipiu ne’ebé besik liu Dili hanesan; Ermera Liquiçá, Aileu no Manatuto, katak bainhira fámilia ruma mate lori kedas ba hakoi iha semitériu sira iha idak-idak nia munisípiu.
“Sé lae lori fali ba Metináro, ita hosi santa Cruz, sai fali ba Metinaro depois mai fali, dupla Gastu, depois ita-nia sidadaun seidauk hanoin kona-ba risku, tanba dalaruma ita la’o ne’e mós bele iha asidente,” nia fó hanoin.
Nia apela ba autoridade munisípiu no administradór munisipiu sira seluk atu fó hanoin no aviza ba komunidade sira katak bainhira família ruma mate iha Dili lori kedas ba horik-fatin atubele hakoi iha semitériu públiku no iha suku sira.
Notísia relevante: Germano Santa: Sidade Dili moos hahú hosi família uma laran
Jornalista : Sérgio da Cruz
Editór : Evaristo Soares Martins
