DILI, 26 setembru 2023 (TATOLI)—Sekretáriu Estadu Asuntu Toponímia Organizasaun Urbana (SEATOU), Germano Santa Brites Dias, segunda ne’e, kontinua halo inspesaun ba fahi luhan sira iha kapitál Dili no husu abitante atu kopera ho Estadu ba orden ijiéne públiku.
Iha inspesaun ne’e, SEATOU ho nia polítika atu konvense abitante ne’ebé okupa rai Estadu no edefísiu antiga finansa tempu Indonézia nian iha Caicoli, iha ne’ebá identifika kuma kain 23 hakiak fahi sei muda ba sira-nia hela fatin iha sira-nia munisipiu ida-idak.
“Fahi nia na’in aseita no kumpre ba lei nu. 33/2008 hodi muda fahi hotu ba ida-idak nia munisípiu. Tanba, haki’ak fahi barak mak hodi okupa espasu públiku no la kria kondisaun di’ak no saudável, hodi husik de’it foer halo degradasaun iha baleta, rezudika ba intupidu no sei kria inudasaun iha tempu udan,” Germano Santa Brites Dias hateten liuhosi komunikadu ne’ebé Agência Tatoli asesu, tersa ne’e.
Inspesaun ne’e kontinua la’o nafatin iha Dili laran, hosi dalan protokolu to’o bairru sei tama sai hodi halo kontrola ba fahi sira-ne’ebé haki’ak fahi maibé laiha kondisaun ijiéne no saúdavel ba komunidade, nune’e SEATOU sei tama no hamoos fatin hodi kontribui moos no saudável.
“Halo inspesaun ho tipu urjente ne’e bazeia ba keixa hosi komunidade afetadu iha bairru sira iha Dili laran, bainhira sente terus hosi fahi-teen nia iis dois afeta ba komunidade nia moris. Dada iis la saúdavel tanba husi fahi-teen dois ne’ebé laiha tratamentu ijiéne tuir orden públiku ba sidadaun ida-ida atu moris iha ijiéne no saúdavel,” nia dehan.
SEATOU hateten inspesaun urjente ne’e servisu kordenasaun hamutuk ho komandu Polísia Nasionál Timor-Leste (PNTL) Administradór Postu administrativu Vera Cruz, ho Ekipa Jestaun Merkadu Munisípiu Dili halo inspesaun iha Suku Caicoli, aldea Sentru Unidade.
Governu hasai ona dekretu-lei nú. 33/2008, kona-ba ijiéne no orden públiku bandu komunidade atu okupa espasu públiku, nune’e nia informa ba komunidade iha kapitál atu kumpre lei no orden, no koopera ho Governu.
“Nune’e ita halo Dili sai ijiéne, moos no saúdavel ba ema hotu,” nia hateten.
Jornalista : Osória Marques
Editór : Cancio Ximenes
