DILI, 13 jullu 2023 (TATOLI)—Sekretáriu Estadu Asuntu Toponomia no Organizasaun Urbana (SEATOU), Germano Santa Brites Dias, husu komunidade atu kontribui ba sidade Dili moos ne’ebé hahú hosi família uma laran.
Notísia Relevante: Komunidade iha Dili seidauk iha konxiénsia soe lixu iha lixeira
“Ita hakaas aan hela atu komunidade bele soe lixu tuir nia oras. No, agora daudaun ne’e ita-nia ekipa hahú instala ona lixu fatin, nune’e ha’u husu komunidade tenke soe iha nia fatin hodi bele kontribui ba sidade moos, maibé ida-ne’e hahú hosi família uma laran,” Governante ne’e hateten ba jornalista sira, hafoin ba vizita lixeira Tibar, kinta ne’e.
Kona-ba implementasaun lei atu fó sansaun ba komunidade ne’ebé soe foer arbiru no soe foer la tuir oras ne’e, nia dehan, agora iha maneira ida mak fó hanoin nafatin ba komunidade atu soe foer iha nia fatin tuir komunidae nia konxiénsia maibé se la tuir nafatin mak sei aplika sansaun ba infratór sira.
“Ita iha lei ida-ne’ebé kontrola ne’e maibé ninia implementasaun terrenu hodi aplika iha kraik. No, agora ita sei iha maneira ida mak ita fó hanoin nafatin nune’e loron ida sei hatene no iha konxiénsia maibé kuandu beibeik mak sei aplika sansaun ba iinfratór sira,” nia dehan.
Tanba ne’e, nia parte observa lixeira Tibar ne’e no ida-ne’e hetan orientasaun hosi Ministru atu haree terrenu no oinsá prepara no hein ekipamentu boot ne’ebé atu mai hodi tau iha fatin. Nune’e, futuru instala ba lixu, ne’ebé namkari iha Dili laran no hosi ne’e mak bele trata lixu ho di’ak.
Daudaun ne’e lixu kontinua namkari iha kapitál iha DILI ne’e, nia parte halo enkontru ho Autoridade Munisípiu Dili nune’e reforsa hodi haree oinsá mak bele trata lixu iha Dili ho di’ak no loloos.
“Horisehik, ha’u enkontru hamutuk ho autorizasaun komunitária, administradór postu administrativu hodi fó hanoin ba nia komunidade atu soe lixu tuir nia fatin no tuir oras ne’ebé termina ona, nune’e kamioneta tula hodi transporta ba lixeira Tibar. Entaun, husu komunidade soe lixu iha kalan mai to’o madrugada no loron saneamentu nia servisu,” nia hateten.
Antes ne’e, Sekretariadu Prezidente Autoridade Munisípiu Dili, António Moniz Clau, hateten iha dekretu-lei 33/2008, liu-liu iha artigu 9 kona-ba koima ba ema sira-ne’ebé soe lixu arbiru (infratór) sira-ne’e hosi $5 to’o $500, maibé ema atu selu sansaun ne’e seidauk define ho loloos entaun presiza padraun balun atu haforsa ho dekretu-lei ruma.
“Agora, ita iha hela preparasaun sei aplika dekretu-lei 33/2008, maibé ita sei servisu ho institusaun relevante inklui mídia sira hotu oinsá atu haree lei ne’e. Se ita ko’alia de’it maibé nunka mais implementa lei ida-ne’e atu atua situasaun sira-ne’e, Dili nunka mais muda,” António Moniz Clau hateten.
Tanba ne’e, Autoridade Munisípiu Dili nia planu mak sei halo koordenasaun ho instituisaun relevante sira atu oinsá ezekuta dekretu lei ida-ne’e ba komunidade no empreza sira-ne’ebé soe foer arbiru iha Dili laran.
Notísia Relevante: Lixu lekar ba-mai, AMD planeia sensibiliza estudante ensinu báziku iha Dili
Jornalista : Osória Marques
Editór : Cancio Ximenes
