DILI, 27 juñu 2023 (TATOLI)—Diretór Servisu Munisipál Água, Saneamentu no Ambiente, Hermínio Moniz Ribeiro, hateten lixeira pontu kolesaun iha kapitál Dili hamutuk 200-resin maibé komunidade mak seidauk konsxiénsia hodi soe lixu iha lixeira.
“Lixeira iha pontu kolesaun hamutuk 200-resin iha kapitál Dili, maibé komunidade balun nafatin la tau lixu tuir nia fatin. Dala ruma, soe lixu iha trotoar no balun soe iha dalan ninin sira, mezmu Autoridade Munisípiu Dili (AMD) halo ona jestaun lixu,” Hermínio Moniz hateten ba Agência Tatoli liuhosi programa “Entrevista Eskluziva” iha estúdiu Tatoli, Faról, tersa ne’e.
Nia hateten, ho pontu kolesaun hirak-ne’e mak AMD kontrata komioneta 70 ho nia pesoál saneamentu hamutuk 100-resin hodi rekolla no transporta lixu hodi soe iha lixeira Tibar-Liquiça.
“Jestaun lixu ami emprega ona ema 100-resin hodi foer iha dalan públiku no ho kamioneta 70 ne’ebé mak halo rekolla lixu iha Dili maibé mak ne’e, problema ema-nia konxiénsia mak ita presiza hadi’a. Tanba, durante ne’e ema ba soe lixu ne’e la soe iha lixu fatin maibé ba soe fali iha ninin sira-ne’e no trotoar besik lixeira hatuur bá. Ida-ne’e mak komunidade hateten ne’e servisu saneamentu nian maibé ita haree di’ak. Jesatun ita halo hela, entaun problema mak tenke hadi’a ema-nia konxiénsia,” nia dehan.
Durante ne’e, AMD sempre halo sensbilizasaun ba komunidade inklui ba estudante sira maibé nafatin seidauk iha konxiénsia.
“Ita-nia parte mak ita halo ona sensiblizasaun iha fatin-fatin hanesan iha eskola no ba komunidade maibe ida-ne’e mak realidade akontese iha sidade.
Diretór ne’e hatutan, tuir peskiza iha kapitál Dili ema ida kada loron prodús lixu metade kilograma, nune’e ekipa saneamentu rekolla lixu hamutuk tonelada 220 kada loron.
“Ida-ne’e problema ba ita, tanba ita halo jestaun lixu maibé ita la tau lixu tuir nia fatin entaun impaktu ba ita-nia ambiente,” nia dehan.
Ba kestaun ne’e, AMD halo ona kolaborasaun ho parseiru sira hanesan Ajénsia Kooperasaun Internasionál Korea (KOICA, sigla inglés), Uniaun Europeia (UE) no Mercy Corps hodi implementa projetu lixu.
“Maibé resiklajen lixu ba kapitál Dili ne’e foin atinje 5% de’it, signifika lixu 95% ne’e ba hotu Tibar, nune’e husu hotu-hotu nia kontribuisaun atu kombate,” nia hateten.
Jornalista : Osória Marques
EDitór : Cancio Ximenes
