DILI, 20 juñu 2023 (TATOLI)—Diretór Servisu Munisipál Agua Saneamentu no Ambiente, Hermínio Moniz Ribeiro, hateten atu garante sidade saudavél mak presiza ema hotu asume responsabilidade, la’ós jestaun saneamentu nian de’it maibé individuál mós tenke kontribui.
Nia hatutan, tanba ne’e durante ne’e Autoridade Munisípiu Dili (AMD) halo sensibilizasaun ba komunidade kona-ba oinsá soe lixu iha lixeira maibé laiha mudans, entaun AMD planeia atu halos ensibilizasaun ba estudante sira iha eskola ensinu bázika sira iha Dili.
“Durante tinan rua ita halo sensibilizasaun ba soe lixu iha lixeira ne’ebé Governu prepara maibé komunidade nafatin soe namkari iha dalan públiku, entaun hosi ne’e ami hanoin atu halo sensibilizasaun ba iha estudante eskola sira liuliu ba ita-nia alin estudante sira iha ensinu báziku sira iha Dili, nune’e sira mak bele esplika fali ba sira-nia inan-aman no família sira,” Diretór Servisu Munisipál Agua Saneamentu no Ambiente, Hermínio Moniz Ribeiro, hateten, ba Agência Tatoli, iha nia kna’ar fatin Matadouro, Dili.
AMD hakarak foku liu ba labarik sira-ne’e hodi bele haree iha mudansa ka lae, tanba durante ne’e maske halo ona sensibilizasun maibé la hatudu gráfiku ne’ebé signifikanter.
“Ita hakarak ba labarik sira iha eskola báziku tanba ita-nia rezultadu sensibilizaun durante ne’e la hatudu gráfiku ne’ebé signifikante, entaun presiza ita koko halo sensibilizasaun liuhosi fali labarik sira,” nia dehan.
“Lixu kontinua lekar iha dalan públiku, AMD muda estratéjia hodi koko fali hosi labarik sira iha eskola báziku no halo jestaun mak AMD maibé responsabilidade ne’e individuál nian mak lixu sei la prejudika servisu jestaun AMD nian,” nia hateten.
Tanba ne’e, AMD sei eduka uluk labarik sira depois mak labarik sira hanorin nia inan-aman no família.
“Ita eduka labarik ein termu konsiénsia duke ema boot,” nia dehan.
Liga ho lixu, nia dehan, AMD prepara ona kontentór 4.000 no sei mai fazeadamente tanba projetu instala ekipamentu modernu nian ne’e sei mai iha meadu jullu ka inisiu jullu, maibé molok ekipamentu to’o mai, AMD halo ona instalasaun ba kontentór iha sidade Dili laran.
“Iha Dili laran, ami prepara fatin barak hodi tau kontentór lixu nian,” nia hateten.
Nia husu ba abitante ida garante nia partisipasaun katak Dili ne’e labele depende de’it ba autoridade nia responsabilidade maibé Dili ne’e atu ema hotu asume responsabilidade katak Dili ne’e “ha’u nian, ha’u mós iha devér no obrigasaun atu kuidadu no kombate lixu, tanba ne’e ema hotu iha responsabilidade hodi soe lixu iha nia fatin”.
Nia hateten, sidadaun ida-idak tenke garante nia aan tanba programa ne’e iha sentidu nasionalizmu, tenke hatudu katak liuhosi kontribuisaun hodi kombate lixu ne’e mós prevene moras.
“Husu para sidadaun ida-idak fó netik kontribuisaun iha loron limpeza ida-ne’e liu-liu iha sidade Dili, nune’e Dili bele furak iha ita hotu nia matan no mós ema seluk nia matan,” nia dehan.
Jornalista : Osória Marques
Editór : Cancio Ximenes
