OEKUSI, 16 Marsu 2026 (TATOLI) – Sekretáriu Estadu Asuntu Toponímia Organizasaun Urbana (SEATOU), Germano Santa Brites, koondena loja Xineza Ren Zhi Unipesoál Lda iha bairru Masin suku Costa sub-rejiaun Pante Makasar Rejiaun Administrativa Espesiál Oekusi Ambeno (RAEOA), tanba hametin no okupa ai-riin elétrika iha espasu públiku.
“Ha’u haree ema xineza ida la kumpre sasán Estadu nian, ai-riin ne’e espasu públiku, tanba sasán Estadu nian tau hotu ba uma-laran, halo uma depois poste elétrika la hasai, halo iha loza laran de’it. Ha’u rona dehan iha suku Costa área Masin, ajuda xefe suku fó hatene bá, haruka hasai tiha no sobu uma muda ba kotuk, dook husi poste ne’e,” SEATOU dehan iha Oekusi, foin lalais ne’e.
Iha biban ne’e, Governante ne’e, rekomenda ba Diresaun Rejionál Terra Propriedade no Diresaun Rejonál Infraestrura (DRI), atu identifika estatutu rai ho nia dezeñu konstrusaun uma, hafoin ne’e atribui kedas notifikasaun ba loja-na’in atu kumpre.
“Kuandu la kumpre, ha’u mai fali informa mai ha’u, tanba ne’e kontra ona, sasán Estadu nian labele okupa, ne’e mós fó ameasa ba ema nia vida liliu viziñu no traballadór sira,” nia hateten.
Notísia relevante:SEATOU orienta Autoridade RAEOA, hahú aban oho animál ne’ebé sirkula iha urbana
Xefe suku Costa, Francisco Colo, informa, sei koordena ho parte EDTL Oekusi atu notifika, tanba antes ne’e autoridade lokál sira komunika direita ho loza na’in maibé la kumpre.
“Loja ne’e halo iha tinan kotuk, momentu foin halo, ami ba hasee, tanba ne’e impaktu kuandu mosu sirkuitu ruma, maibé ikusmai, ita haree rasik poste ne’e tama hotu iha uma-laran, ne’ebé ita sei koordena ho parte EDTL, atu notifika, kuandu la kumpre, ita informa ba SEATOU mak foti desizaun,” nia hateten.
Notísia relevante:SEATOU introdús enkuadramentu legál haat iha Oekusi atu re-konfirma nia implementasaun
Antes ne’e mós, SEATOU sensibiliza ona enkudramentu legál haat ba autoridade lokál sira inklui membru Autoridade sira iha Oekusi kona-ba Ordenamentu Territóriu, Serbisu Ijiéne Ordén Públika, Organizasaun Urbana no Jestaun ba Zona Estensionamentu Durasaun Limitada (ZEDL), atu re-konfirma fila-fali nia implementa iha Oekusi.
Jornalista: Abílio Elo Nini
Editór: Rafael Ximenes de A. Belo
