OEKUSI, 10 Marsu 2026 (TATOLI) – Sekretáriu Estadu Asuntu Toponímia Organizasaun Urbana (SEATOU), tersa ohin, sensibiliza enkudramentu legál haat ba autoridade lokál sira inklui membru Autoridade sira iha Rejiaun Administrativa Espesiál Oekusi Ambeno (RAEOA) kona-ba Ordenamentu Territóriu, Serbisu Ijiéne Ordén Públika, Organizasaun Urbana no Jestaun ba Zona Estasionamentu Durasaun Limitada (ZEDL), atu re-konfirma fila-fali nia implementa iha Oekusi.
“Atividade sensibilizasaun ne’e, bazeia orientasaun husi Ministériu Administrasaun Estatál (MAE), hodi introdús programa prinsipál haat ne’e iha munisipíu sira inklui RAEOA no Atauro, atu re-konfirmasaun fila-fali programa sira-ne’e, nia implementasaun, ho nia baze legál sira iha baze,” Diretór Nasionál Ijiéne Ordén Públika husi SEATOU, Egas José Caetano, informa, iha salaun administrasaun Numbei, ohin.
Notísia relevante:SEATOU sensibiliza dekretu-lei ijiene no orden públika iha Oé-Cusse
Tuir diretór, RAEOA nia estrutura la hanesan ho munisípiu sira seluk, tanba diresaun atu trata asuntu Ijiéne Ordén Públika, Jestaun Merkadu Turizmu, Serbisu Munisipál Água, Saneamentu no Ambinete (SMASA), Obra Públika ho Terra Propriedede, sira-nia serbisu diferénsia ho munisípiu sira seluk.
Tan ne’e maka, Governu anúnsia ona katak, estrutura tranzitória atuál, sei termina mandatu iha 31 Marsu 2026 ne’e, nune’e espera katak husi loron 01 Abríl ba oin ne’e, estrutura definitiva ne’e, sira hahú serbisu másima bazeia ba saida mak ema hotu hakarak hanesan mós ho munisipíu seluk, hala’o daudaun ona.
“Tanba ne’e maka, ita (SEATOU) mai fó asisténsia téknika relasaun
ho pontu prinsipál haat ne’ebé mak ohin ita sensibiliza ona, ho nia baze legál lima, alvu ba autoridade komunitária sira, xefe aldeia, xefe suku no administradór postu, tanba sira-ne’e mak besikliu ho komunidade,” nia afirma.
Ezekutivu ne’e esplika, asisténsia téknika baze legál lima ne’e mak hanesan Jestaun Ijiéne Ordén Públika, mensajen publisidade, baze legál ida mak asuntu Toponímia, Estasionamentu Durasaun Limitada no Rezidu Sólidu Urbana ka jestaun lixu, nune’e sira bele hala’o serbisu ba ida-ne’e.
“Ita mós fó hanoin ba sira, karik implementasaun ba asuntu haat ne’e iha preokupasaun, bele komunika ho Governu Sentrál liuhusi SEATOU ita sei mai fó asisténsia téknika, intermus kuadru legál sira-ne’ebé utiliza hodi organiza sidade urbana iha territoriu tomak,” nia afirma.
Notísia relevante:Lixu nakonu iha mota-ninin área Samoro-Pante Makasar, komunidade preokupa
Iha biban ne’e, Koordenadór ZEEDOA, Herculano de Souza, reprezenta Prezidente Autoridade RAEOA, agradese ekipa SEATOU tanba ho pontu prinsipál haat ne’e, bele apoia ona autoridade RAEOA atu ezekuta iha Oekusi.
“Informasaun sira-ne’e importante atu hasa’e koñesimentu kona-ba enkudramentu legál sira-ne’ebé ohin esplika ona, ne’e hanesan referénsia ba RAEOA atu fó hanoin fila-fali, taba dezde 20214 to’o ohin loron Oekusi nia estatu la hanesan ho munisipíu seluk, tanba ne’e agradese ba SEATOU, ohin bele partilla ona informasaun dirijente hotu hahú husi aldeia mai to’o membru autoridade sira,” nia orgullu
Notísia relevante:SEATOU kontinua sosializa dekretu-lei ijiene no orden públika iha Oekusi
Entretantu hafoin ekipa SEATOU aprezenta enkuadramentu legál lima ba entidade sira iha Oekusi, promove mós diskusaun hodi husu no hatan, liu-liu ba jestaun lixu, sirkulasaun animál livre inklui Zona Estasionamentu Durasaun Limitada.
Partisipa iha atividade sensibilizasaun ne’e, mai husi xefe suku 20 no xefe aldeia sira, jestór sub-rejiaun haat, PNTL no F-FDTL inklui kargu xefia sira no membru Autoridade RAEOA.
Jornalista: Abílio Elo Nini
Editór: Rafael Ximenes de A. Belo
