OEKUSI, 11 Marsu 2026 (TATOLI) – Sekretáriu Estadu Asuntu Toponímia Organizasaun Urbana (SEATOU), Germano Santa Brites, kuarta ne’e, fó ona orientasaun ba Autoridade Rejiaun Administrativa Espesiál Oekusi Ambeno (RAEOA) ho Komandu Polísia Nasionál Timor-Leste (PNTL), komesa aban ba oin, oho animál, hanesan karau bibi no fahi, ne’ebé kontinua sirkula iha espasu públiku liuliu iha área urbana.
Notísia relevante:Animál livre iha área urbana Pante Makasar, suspeitadu líder balun nian
Governante hateten, hafoin hala’o enkontru ho membru autoridade RAEOA, autoridade komunitária sira inklui entidade relevante seluk iha salaun administrasaun Numbei, ohin.
“Kontrola sidade nafatin, Komandante PNTL, aban ba oin animál sira sirkula iha espasu públiku oho de’it, Primeiru-Ministru (PM) mai lakoi haree tan animál sira la’o tuir estrada sira iha vila laran ne’e, oho tiha, na’an-sira lori ba fó oan-ki’ak sira, sira mós presiza na’an, oho hasai foto manda ba ha’u, depois informa ba animál na’in-sira katak, ha’u (SEATOU) mak haruka atu oho,” nia hateten iha salaun administrasaun Numbei, ohin.
Nia apela, bainhira oho tiha animál, importante labele han, maibé fó oan-ki’ak sira tanba ne’e husu Autoridade presiza estabele ona ekipa konjunta, no kalendariza planu operasaun, maibé loloos lorloron halo operasaun tanba lei iha.
“Selae abuza no trosa fali ita no trosa fali lei, sorti Oekusi ita la’o mai uza pasaporte, sei besik karik hanesan Dili mai Likisá, lorloron ha’u tama hela iha ne’e, atu haree sidade ninia furak ne’e, husu PNTL akompaña ekipa ordén públika hahú hala’o serbisu, uza dima, hetan iha estrada oho, oho tiha bolu animál-na’in fó hatene de’it, lalika fó na’an. Lei ne’e iha ba ita atu hala’o serbisu ho di’ak, lalika tolera ba malu, selae serbisu la la’o, vila laran ita haree runggu-rangga,” nia hateten.
Notísia relevante:SEATOU nota komunidade sei husik livre animál iha Vikeke
Xefe suku Costa, Francisco Colo, orgullu, tanba durante ne’e autoridade komunitária sira fahe ona informasaun ba públiku maibé iha komunidade seidauk iha konsiénsia atu haki’ak animál iha nia fatin.
“Ida-ne’e lei mak orienta, hanesan autoridade suku fahe nafatin informasaun ba komunidade sira katak territóriu Costa ne’e área urbana, presiza koopera atu asegura ambiente ne’e nia furak, entaun ema hotu tenke iha konsiénsia, nune’e bele hasees animál husi kapitál rejionál, atu ita-nia rai bele moos, labele iha dezastre tanba de’it animál barak toba iha estrada,” nia hateten.
Notísia relevante:Autoridade Kovalima la tolera komunidade husik animál la’o livre
Entretantu, área urbana ne’ebé bandu atu husi animál sirkula livre, kobre suku lima, hahú husi fronteira Sakato suku Nípani, suku Costa to’o ponte Noefefan suku Lifau, kontinua ba to’o terminál Tono suku Cunha no Lalisuk.
Jornalista: Abílio Elo Nini
Editór: Rafael Ximenes de A. Belo
