VIKEKE, 24 Fevereiru 2026 (TATOLI)—Ekipa Sekretaria Estadu Asuntu Toponímia no Organizasaun Urbana (SEATOU) nota katak iha sidade urbana Munisípiu Vikeke nian komunidade kontinua husik livre animál iha arredór públiku.
Diretór Nasionál Ijiene Oden Públika SEATOU, Egas José Caetano, haktuir ekipa SEATOU halo ona sosializasaun ba Dekretu-Lei nú. 3/2024, 17 Jeneiru, alterasaun dahuluk husi Dekretu-Lei nú. 33/2008, 27 Agostu, kona-ba ijiene orden públika, proibe atu husik livre balada sira iha fatin públiku.
“Antes ne’e ha’u rasik mak mai halo ona sosializasaun Dekretu-Lei Ijene Orden Públika nian ba autoridade sira. Maibé, agora daudaun ita haree ne’e aminál sira (bibi, karau no fahi) kontinua la’o livre hela iha kapitál Vikeke laran,” Egas hateten iha Munisípiu Vikeke, Tersa ne’e.
Notísia relevante: PAM Vikeke orienta ekipa halo operasaun ba animál la’o livre
Hatán ba kestaun ne’e, Prezidente Autoridade Munisípiu Vikeke, Francisco C. S. de G. Soares, hateten durante ne’e implementa regra kontrola balada maibé seidauk másimu tanba ne’e sei konvoka ekipa toponímia sira atu haree kestaun ne’e.
“Implementasaun mak seidauk másimu, tanba ne’e ekipa SEATOU mai fanu ita. Maski durante ne’e ita realiza servisu sira ograniza animál labele husik livre, maibé kontinua la’o livre. Ida-ne’e responsablidade autoridade lokál sira-nian atu fó-atensaun ba dekretu-lei referida,” nia hato’o.
Francisco kompromete Munisípiu Vikeke prontu servisu hamutuk ho SEATOU atu organiza komunidade no organiza sidade sai sidade ida digna.
Antes ne’e, autoridade munisípiu lansa ona karta sirkulár sira no forma ona ekipa toponímia hodi kontrola balada sira-ne’ebé husik livre iha espasu públiku sira.
Jornalista: Vitorino Lopes da Costa
Editór: Xisto Freitas da Piedade
