PAM Vikeke orienta ekipa halo operasaun ba animál la’o livre
VIKEKE, 25 Juñu 2025 (TATOLI)—Prezidente Autoridade Munisípiu (PAM) Vikeke, Francisco C.S de G. Soares, kuarta ne’e, hahú orienta ekipa sira hodi halo operasaun konjunta ba animál sira-ne’ebé la’o livre iha espasu públiku iha postu Vikeke Vila.
Notísia Relevante: Autoridade Vikeke lansa sirkulár bandu animál husik livre iha espasu públiku
Prezidente Autoridade Munisípiu (PAM) Vikeke hateten, ekipa operasaun ba animál ne’e bázeia ba karta sirkulár ne’ebé foin lalais fó-sai ona, nune’e ohin ekipa konjunta ne’e tun hodi haree animál sira-ne’ebé sei livre hela iha espasu públiku.
“Ohin, ita-nia ekipa operasaun simu orientasaun hodi hala’o kna’ar ba halo operasaun ba animál sira-ne’ebé sei livre iha espasu públiku. Ha’u husu ekipa operasaun sira servisu ho responsablidade, labele hanoin oportunidade hodi ba oho ema-nia animál sira-ne’ebé kesi besik ne’e labele,” PAM Vikeke ne’e hateten iha serimónia abertura operasaun animál, iha salaun VIP munisípiu Vikeke, ohin.
Autoridade Vikeke ne’e afirma, komunidade triste bainhira lansa tiha ona sirkulár maibé ema kontinua husik animál la’o livre hodi sirkula iha espasu públiku, edifísiu no párokia sira.
“Tanba ne’e, ita labele husik animál kontinu livre nune’e. Ami kontinua akompaña ekipa operasaun sira no ekipa operasaun kontinua informa ba komunidade hodi sulan sira-nia animál. Se la sulan animál, hanesan ha’u dehan ultima rekursu mak oho animál,” nia dehan.
Bazeia ba Dekretu-Lei nú. 3/2024, 17 Jeneiru, alterasaun dahuluk husi Dekretu-lei nú. 33/2008, 27 Agostu, kona-ba ijiene erdéen públika, artigu alinea 1 dekreta proibe ba balada sira atu labele sirkula iha estrada públiku no fatin públika.
Iha fatin hanesan, komandante Polísia Nasionál Timor Leste (PNTL) munisípiu Vikeke, Superintendente Polísia Antonio Rego Fernandes, haktui, operasaun konjunta ne’e parte PNTL sei akompaña ekipa sira husi kotuk hodi haree krime sira-ne’ebé mosu.
“Ohin, ekipa operasaun atu ezekuta karta sirkulár ne’ebé antes ne’e fó sai ona. Ha’u husu ba ekipa sira tenke servisu onestidade hodi atua animál sira-ne’ebé husik livre iha espasu públiku. Nune’e, ba operasaun ne’e ami kontinua fó apoia ba ekipa operasaun no membru PNTL sira sei akompaña husi kotuk, karik ema ruma halo krime hasoru ekipa operasaun sira hodi PNTL atua ba krime. Tanba ne’e, PNTL la’ós ba oho animál, maibé sira-nia servisu mak akompaña ekipa sira,” nia hateten.
Diretór Agua no Sameamentu Munisípiu Vikeke, Guilhermino Gomes, relata ekipa operasaun ba animál hamutuk ema na’in-18 sei hala’o kna’ar ba operasaun animál sira-ne’ebé iha espasu públiku.
“Ita-nia ekipa operasaun ne’e hahú husi ohin ba oin kontinua halo kontrolu ba animál sira-ne’ebé husik livre hodi okupa iha espasu públiku sira,” nia dehan.
Ekipa operasaun ba animál ne’e maihusi diresaun sira-ne’ebé eziste iha munisípiu Vikeke ne’ebé kompostu husi guarda floresta, esgotu, diresaun Jestaun Merkadu no Turizmu no diresaun Agua no Saneamentu no akompaña husi PNTL.
Jornalista : Vitorino Lopes da Costa
Editór : Cancio Ximenes
