Rai Suut Raitahu akontese hikas hodi hamosu ahi lakan iha Uma Uain Kraik

VIKEKE, 21 Novembru (TATOLI)—Rai-lakan ne’ebé akontese maizumenus tuku 09h00 sábadu (21/11) kalan ne’e, kauza husi Rai Suut Raitahu akontese fila-fali hodi hamosu ahi lakan iha Suku Uma Uain Kraik, Postu Administrativu Vikeke Vila, Munisípiu Vikeke.
Tuir komunidade Uma Uain Kraik, Postu Administraivu Vikeke Vila, Munisípiu Vikeke, Mateus Miguel, haktuir, akontese foin rai-lakan ne’e, rai suut mak akontese lakan fila-fali iha minutu balun liuba, akontesimentu kada tinan dala ruma akontes, maibé foin ne’e tarutu dala ida mak ahi lakan sai.
“Akontese rai-lakan foin ne’e, rai suut mak akontese tan fila-fali. Maibé, kada tinan kuandu lakan sai ne’e, rai bubu sa’e mak foin akontese. Maibé, tinan ida-ne’e rai la bubu sa’e akontese ahi lakan sa’e. Ohin, akontese uluk rai tarutu dala ida, la kle’ur mosu ahi-lakan. Nune’e, ami hanoin katak tasi mak sa’e,” Mateus Miguel hateten ba TATOLI, iha Postu Vikeke Vila, ohin.
Mateus hatutan, akontesimentu ahi lakan ne’e halo komunidade Raitahu trauma hotu, tanba akontese rai tarutu maka’as mak akontese ahi lakan sa’e maka’as.
“Akontese rai-lakan ne’e halo ami trauma hotu, ami hanoin tasi mak sa’e tanba tarutu maka’as, maibé agora rai-lakan para fali ona,” nia dehan.
Nia dehan, akontesimentu rai suut ne’e distánsia dook husi komunidade besik tasi ne’ebé la afeta ba komunidade iha ne’e.
“Akontese rai suut ne’e iha duni ami- nia suku, maibé distánsia dook husi ami purvolta kilo rua resin, nune’e afeta ba komunidade ladun,” nia subliña.
Iha fatin ketak Komadante Autoridade Protesaun Sivil (APC, sigla portugés), Cirilio Soares Gomes, informa,akontese rai-lakon foin dauuak ne’e rai suut parte Raitahu mak akontese fila-fali.
“Agora daduak ami prepara atu dezloka bá fatin akontesimentu hodi observa direta, depois ami observa lai mak fó sai fali ba públiku,” nia dehan.
Jornalista : Vitorino Lopes da Costa
Editór : Cancio Ximenes

