KOVALIMA, 23 Jullu 2025 (TATOLI)- Reprezentante Autoridade Munisípiu Kovalima, kuarta-ne’e, lidera reuniaun konsellu koordenasaun munisipál hodi diskute no deside la tolera, nune’e sei oho komunidsade ne’ebe husik animál hanesan asu la’o livre iha munisipiu Kovalima.
Autoridade Kovalima liuhusi diskusaun reuniaun konsellu koordenasaun munisipál diskute hodi aprova atu oho asu ne’ebé mak komunidade sira husik livre ne’ebe ho votus afavor sei oho asu ne’ebé husik livre hamutuk 24 relasiona virus raiva.
“ Iha enkontru ida-ne’e kona-ba virus raiva, ohin ita hotu fó hanoin ba malu ona sei oho asu sira ne’ebé husik livre. Tanba ne’e sidadaun ne’ebé mak hakiak asu presiza atu kesi ka sulan, nune’e labele hakotu ema nia vida”, PAM Kovalima, Interinu Caetano Ribeiro dos Santos, hato’o iha diskusaun reuniaun konsellu koordenasaun munisipál iha salaun AMC ohin.
Iha fatin hanesan, Diretór Servisu Saúde munisípiu (SSM) Kovalima, Domigos Sequeir, reforsa katak presiza duni halo asaun, tanba durante ne’e pesoál saúde (PS) sira hala’o ona intervensaun hodi partilla informasaun ho mekanismu oi-oin .
“Ami partilla informasaun kona-ba virus raiva liuhusi hala’o atividade kalan loke filme kona-ba virus raiva tama sai bairru fó sai avizu tama sai bairru, maibé komunidade sira nafatin laiha konsensia no husik nafatin asu livre , tanba ne’e presiza foti asaun”, nia afirma.
Aleinde partilla informasaun fó sai ona sirkulár rua mak hanesan sirkulár husi autoridade munisípiu Kovalima no sirkulár konjunta husi Ministériu Administrasaun Estatál (MAE), Ministériu Pekuária, Peska no Floresta (MAPPF) no mós Ministériu Saúde (MS) atu labele husik asu la’o livre.
Bazeia ba dadus Servisu Saúde Munisípiu Kovalima rejista hahú Janeiru to’o jullu ne’e rejista ona kazu virus raiva hamutuk 330 husi númeru ne’e na’in-hitu mak lakon ona vida.
Jornalista :Celestina Teles
Editór: Florencio Miranda Ximenes
