BOBONARU, 02 Setembru 2025 (TATOLI)—Sekretariadu Tékniku Administrasaun Eleitorál (STAE) Delegasaun Territoriál Munisípiu Bobonaru halo Resensiamentu Eleitorál no Atualizasaun Baze Dadus (REABD) ho baze biométriku ba eleitór ho kondisaun Ema ho Defisiénsia (EhD) no idozu hamutuk na’in-6.110.
Diretór STAE Munisípiu Bobonaru, Mariano Viegas Amaral informa dadus ne’e rejista liuhusi atividade rejistu movel faze dahuluk ne’ebé lansa iha Postu Administrativu Bobonaru iha 29 Jullu liubá no finaliza iha Postu Administrativu Balibó iha 25 Agostu tinan ne’e.
“Iha fulan-Jullu ne’e halo atendimentu ba eleitór hamutuk 1.339 kompostu husi eleitór foun 129, eleitór tuan ka atualizadu 1.210. Enkuantu, fulan-Agostu totál eleitór 4.771, foun 240, atualizadu 4.531,” nia informa ba jornalista sira iha kna’ar-fatin, Tersa ne’e.
Notísia relevante: STAE Bobonaru lansa REABD movel prodús kartaun biométriku ba Idozu-EhD
Diretór ne’e subliña hosi númeru eleitór rejistadu, STAE entrega ona kartaun eleitorál fíziku ho baze biométriku ba eleitór sira iha Postu Administrativu Bobonaru ho Lolotoe, entretantu postu administrativu sira seluk hanesan Kailaku, Atabae ho Balibó sei iha prosesu.
“Ninia razaun seidauk prodús sai tanba STAE iha server ida de’it iha sentrál. Munisípiu hotu-hotu halo atividade hanesan mós vizita postu administrativu. Loron ida ita bele rejistu eleitór husi 3.000 to’o 4.000. Sistema ne’e bele aprova eleitór idak-idak nia dadus,” diretór ne’e haktuir.
Mariano relata STAE dadaun ne’e planeia atu implementa REABD movel faze daruak hahú uluk iha postu Administrativu Lolotoe durante semana ida hafoin kontinua ba postu administrativu sira seluk.
Molok halo atendimentu ba eleitór sira, Diretór Mariano tenik, ba dahuluk STAE sei halo sosializasaun lei no kritéria REAB ba autoridade lokál no autoridade seguransa sira atubele partilla informasaun no mobiliza komunidade mai trata kartaun eleitorál ho baze biométriku, lori ho dokumentu komprovativu sira hanesan Sertidaun RDTL orijinál ho foto kópia tahan ida. Bainhira dokumentu ne’e laiha bele mós lori Billete Identidade (BI) ka Pasaporte válidu.
Jornalista: Sergio da Cruz
Editór: Xisto Freitas da Piedade
