Top

Indonézia reafirma apoiu ba Timor-Leste atu prezide ASEAN iha 2029

Indonesian Day 2026. Imajen/Mídia PR.

DILI, 22 Novembru 2026 (TATOLI)–Indonézia reafirma ninia apoiu tomak ba aspirasaun Timor-Leste atu asume Prezidénsia ASEAN iha tinan 2029, nu’udar parte husi esforsu atu hametin relasaun bilaterál no kooperasaun rejionál entre nasaun rua.

Enkarregadu Asuntu Ad Interim (KUAI) Embaixada Indonézia iha Dili (KBRI), Raden Sakunto Paksi, afirma katak apoiu ne’e reflete relasaun amizade no kooperasaun entre Indonézia no Timor-Leste ne’ebé kontinua sai metin, liuliu iha área ekonómika.

Nia hateten katak relasaun komersiál entre nasaun rua kontinua dezenvolve, ne’ebé hatudu liuhusi rezultadu komérsiu iha tinan kotuk ne’ebé atinje besik  millaun  $424, ho aumentu liu 8% kompara ho tinan sira liubá. Ho rezultadu ne’e, Indonézia kontinua sai parseiru komersiál boot liu ba Timor-Leste.

Tuir nia, prezensa komunidade no empreza Indonézia iha Timor-Leste fó ona kontribuisaun pozitivu ba dezenvolvimentu ekonómiku nasaun nian, no mós enrikese sosiedade multikulturál iha Timor-Leste.

“Ha’u hanoin amizade entre Indonézia no Timor-Leste mós reflete apoiu kontinua husi Indonézia ba dezenvolvimentu no kapasitasaun Timor-Leste, tantu iha kontestu bilateral no rejionál,” Raden Sakunto Paksi dehan iha nia diskursu, durante selebrasaun amizade RI-TL, iha Timor Plaza, sábadu (21/11).

Iha kontestu rejionál, Raden Sakunto afirma katak Indonézia kontinua fó apoiu ba partisipasaun no integrasaun Timor-Leste iha ASEAN, inklui aspirasaun nasaun ne’e atu asume Prezidénsia ASEAN iha tinan 2029.

“Iha okaziaun ne’e, ha’u hakarak reafirma apoiu tomak Indonézia nian ba aspirasaun Timor-Leste atu prezide ASEAN iha tinan 2029, hanesan ita hotu hatene katak Prezidente Prabowo Subianto temi ona iha loron hirak liubá, durante Sumeira ASEAN iha Manila,” nia afirma.

Tuir nia, bainhira Timor-Leste lidera Prezidénsia ASEAN dahuluk iha 2029 ho susesu, ida-ne’e sei sai susesu koletivu ba ASEAN tomak.

Nia mós afirma katak Indonézia no Timor-Leste ohin loron la’ós de’it nasaun viziñu, maibé mós nasaun membru ASEAN ne’ebé tuur hamutuk iha meza hanesan.

Paksi hatutan katak, iha nivel bilaterál, Indonézia kontinua hametin kooperasaun dezenvolvimentu liuhusi programa asisténsia téknika no kapasitasaun iha área oioin.

Nia fó ezemplu kona-ba Memorandu Entendimentu ne’ebé Banku Sentral Timor-Leste (BCTL) no Bank Indonesia asina iha fulan Setembru, kona-ba sistema pagamentu no inovasaun finanseira dijitál.

“Akordu ida-ne’e marka pasu importante ida iha ami-nia esforsu atu halo sistema pagamentu entre nasaun rua sai fasil liután. Bank Mandiri no Bank BRI mós bele kontribui liuhusi sira-nia esperiénsia iha prestasaun servisu ba empreza no kliente sira,” Raden Paksi dehan.

Nia konsidera katak parseria ne’e hatudu kompromisu komún husi instituisaun sira iha nasaun rua atu aproveita teknolojia dijitál, hadi’a servisu finanseiru, apoia atividade ekonómika no hametin ligasaun entre ekonomia rua.

Iha biban hanesan, Primeiru-Ministru Kay Rala Xanana Gusmão hato’o agradeseimentu ba Indonézia tanba apoiu ne’ebé fó ba Timor-Leste atu sai ona membru ASEAN ba da-11.

“Ha’u mós hato’o agradeseimentu ba Singapura no Tailándia, tanba sira loke an atu ajuda Timor-Leste prepara an hodi asume Prezidénsia ASEAN iha tinan 2029,” PM Xanana dehan.

Xefe Governu ne’e afirma katak Timor-Leste sei kontinua konta ba amizade no kooperasaun husi Indonézia no parseiru ASEAN sira seluk.

Jornalista : Osória Marques

Editór        : Cancio Ximenes

Publisidade

Leave a Reply

Latest Post

error: Content is protected !!