Top

Indonesian Day 2026 hametin kooperasaun entre Timor-Leste no Indonézia

Z_94

DILI, 22 Novembru 2026 (TATOLI)–Prezidente Repúblika, José Ramos-Horta, hateten Indonesian Day 2026 la’ós de’it selebra kultura, múzika no dansa, maibé mós oportunidade importante atu hametin amizade no kooperasaun entre Timor-Leste no Indonézia.

PR Ramos-Horta afirma relasaun entre Timor-Leste no Indonézia iha baze istóriku, amizade no kulturál, maske iha tempu pasadu nasaun rua hasoru momentu defísil maibé liuhusi prosesu rekonsiliasaun, respeitu no amizade, nasaun rua konsege harii relasaun di’ak to’o ohin loron.

“Timor-Leste no Indonézia nu’udar nasaun viziñu ne’ebé iha ligasaun istórika, familiár no kulturál. Maske ita-nia istória liu ona tempu susar maibé ita konsege harii relasaun bazeia ba rekonsiliasaun, respeitu no amizade. Ohin, ita hakarak kontinua harii hamutuk,” PR Horta dehan iha nia diskursu, iha ambitu selebrasaun amizade TL-RI, iha Timor Plaza.

Xefe Estadu ne’e subliña katak komunidade Indonézia iha Timor-Leste halo parte importante iha moris loro-loron liuhusi kontribuisaun emprezáriu, komersiante, profesór, profisionál saúde, membru kooperativa no traballadór sira ba ekonomia, edukasaun no dezenvolvimentu nasaun.

Nia mós destaka papél importante joven Indonézia sira-ne’ebé moris, estuda no servisu iha Timor-Leste, liuhusi edukasaun, desportu, múzika, dansa, interkámbiu kulturál, voluntariadu no inisiativa emprezariál, ne’ebé kontribui ba hametin relasaun entre komunidade rua.

Laureadu Nobel da Paz ne’e konsidera joven Timoroan no Indonéziu sira iha papél importante atu halo Komunidade ASEAN sai realidade, liuhusi transforma fronteira sira ba ponte amizade no enkontru entre povu sira.

“Tanba ne’e, ha’u apela ba emprezáriu no empreendedór sira husi nasaun rua atu aproveita oportunidade negósiu, esplora merkadu foun no habelar kooperasaun bilateral no rejionál iha ASEAN, liuliu iha setór agrikultura, komérsiu, turizmu, edukasaun, teknolojia, indústria no servisu,” nia dehan.

Nia enfatiza katak kooperasaun iha setór hirak-ne’e bele kria empreza foun, hamosu oportunidade empregu no hadi’a kondisaun moris povu iha nasaun rua.

Aleinde ne’e, Ramos-Horta hato’o agradeseimentu ba povu Indonézia tanba akollimentu ne’ebé fó ba estudante Timoroan rihun ba rihun ne’ebé kontinua sira-nia estudu iha universidade no instituisaun ensinu superiór iha Indonézia, inklui traballadór no sidadaun Timoroan sira ne’ebé hela iha nasaun ne’e.

“Ha’u hein katak sidadaun Indonézia sira ne’ebé moris no servisu iha Timor-Leste bele sente an hanesan iha sira-nia uma rasik, ho amizade, respeitu no ospitalidade husi komunidade Timoroan,” Horta dehan.

Nia mós fó apresiasaun ba inisiativa solidariedade ne’ebé hala’o iha eventu ne’e, liuhusi entrega doasaun ba orfanatu Uma Domin Manleu no Alma. Nune’e, amizade entre povu rua la’ós de’it manifesta liuhusi relasaun diplomátika no kooperasaun, maibé mós liuhusi domin, solidariedade no apoiu ba labarik sira ne’ebé presiza tulun.

Jornalista : Osória Marques

Editór        : Cancio Ximenes

Publisidade

Leave a Reply

Latest Post

error: Content is protected !!