ME hato’o sentidu kondolénsia ba família Palomita Gusmão Guterres

DILI, 21 Novembru 2026 (TATOLI)–Ministra Edukasaun, Dulce de Jesus Soares, no Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Domingos Lopes Lemos, hato’o sentidu kondolénsia profunda ba família Palomita Gusmão Guterres nian, ne’ebé mate tanba akontesimentu trájiku.
Ministériu Edukasaun (ME) fó sai katak instituisaun ne’e hato’o solidariedade ba família no hakarak Alin Palomita deskansa iha pás, depois fila ba Maromak nia kadunan santu ho sedu liu.
“ME rejeita no kondena maka’as kualkér forma violénsia, seja hosi edukadór ba estudante, estudante ba edukadór ka estudante ba estudante seluk, inklui violénsia iha relasaun sira,” refere nota komunikadu ne’ebé TATOLI asesu, ohin.
Aleinde lei sira-ne’ebé regula konduta edukadór no estudante, no fó konsekuénsia dixiplinár ba hahalok violénsia hotu, ME kontinua esforsu atu hametin aprendizajen olístiku inklui dezenvolve estudante sira-nia kapasidade atu apoia malu, komunika ho respeitu, ajuda no defende malu bainhira ema ruma hasoru perigu.
Nia mós enfatiza katak kultura Timoroan fó importánsia boot ba komunidade, respeitu no tulun-malu maibé akontesimentu iha loron 19 Novembru hatudu falta kompaixaun no interese husi ema balun inklui foinsa’e no ema boot ne’ebé hili atu grava duké fó ajuda ba vítima.
ME konsidera hahalok ne’e la tuir valór kulturál no identidade povu Timor-Leste nian, no rejeita hahalok ne’e.
Ministériu Edukasaun, hamutuk ho parseiru no instituisaun Governu nian, kontinua reforsa ambiente eskola ne’ebé seguru, akompañamentu ba estudante no edukasaun ba valór morál no sivika, hodi hatán ba dezafiu sira-ne’e ho responsabilidade no laran-luak.
ME mós husu ba família, komunidade no juventude tomak atu hametin laran-sadi’a no korajen atu tulun malu, no fó atensaun espesiál ba ema vulnerável, inklui labarik no foin-sa’e feto sira. “Deskansa iha pás, Palomita. Ami-nia orasaun no solidariedade hamutuk ho família”.
Jornalista : Osória Marques
Editór : Cancio Ximenes

