Top

Prezidente Ramos-Horta hato’o sentidu kondolénsia ba família Palomita Gusmão Guterres

Movimentu advikasia kompostu husi organizasaun sosiedade sivíl ne'ebé defende diretu feto no diretu umanu, realiza marsa pasifíka ho tema harahun silénsiu,labele igrona tan violénsia hasoru feto Timor-Leste, marsa ne'e hahú husi Jardím 5 de maiu Dili ho rute bá Ministériu Justisa, Kuartél Jerál PNTL, Parlamentu Nasionál, Palasiu Governu no remata iha Largo Lecidere Dili hodi ejize justisa ba matebian Palomita no no feto maluk sira seluk atu hadia lei sira ne'ebé sei iha lakunas hodi fó biban ba ema atu komete violénsia hasoru feto, Dili 20 Novembru 2026.Foto TATOLI/Antonio Daciparu.

DILI, 21 Novembru 2026 (TATOLI)–Prezidente Repúblika, José Ramos-Horta, hato’o sentidu kondolénsia ne’ebé kle’an no solidariedade ba família vítima Palomita Gusmão Guterres, ne’ebé mate iha akontesimentu trájiku.

Iha karta kondolénsia ofisiál ne’ebé dirije ba família enlutada iha Matadouro, Suku Mascareñas, Prezidente Ramos-Horta espresa tristeza no konsentrasaun kle’an tanba lakon vida foinsa’e nian, hodi reafirma ninia solidariedade ba família iha momentu triste no laran-susar ne’e.

“Liafuan ida mós labele kura tomak triste ka laran-moras ne’ebé mosu tanba akontesimentu ne’ebé derrepente tebes ida-ne’e,” dehan nota Komunikadu ne’ebé TATOLI asesu, ohin.

Prezidente Ramos-Horta mós fó apelu ba autoridade judisiál no polísia kompetente sira atu hala’o prosesu legál ho rigor, dedikasaun no determinasaun máximu, hodi garante apuramentu loloos ba faktu sira hotu no hala’o justisa, hodi respeita memória Palomita nian, ninia família no Estadu Direitu.

Xefe Estadu harohan ba deskansa eternu ba klamar Palomita nian, no husu ba Maromak Kbiit-Na’in atu fó forsa, aten-brani no pás ba família enlutada, ema sira ne’ebé nia hadomi no ema hotu ne’ebé besik ba nia.

Jornalista : Osória Marques

Editór        : Cancio Ximenes

Publisidade

Leave a Reply

Latest Post

error: Content is protected !!