Top

Povu Timor-Leste no povu Indonézia nu’udar Maun-Alin

Primeiru-Ministru, Kay Rala Xanana Gusmão. Imajen/Mídia PR.

DILI, 22 Novembru 2026 (TATOLI)–Primeiru-Ministru, Kay Rala Xanana Gusmão, hateten relasaun entre povu Timor-Leste no Indonézia liu ona prosesu istóriku ne’ebé defísil liuliu durante tinan 24, inklui prosesu rekonsiliasaun ne’ebé sai etapa importante atu harii relasaun bazeia ba respeitu no amizade hanesan maun-alin.

“Ohin loron, povu Timor-Leste no Indonézia la’ós de’it moris nu’udar nasaun viziñu, maibé ita moris hanesan maun-alin,” Primeiru-Ministru, Kay Rala Xanana Gusmão, hateten iha nia diskursu, iha ambitu selebrasaun amizade TL-RI, iha Timor Plaza.

Xanana hatete katak, maske Timor-Leste atinje ona tinan 24 independénsia, sei iha servisu barak ne’ebé presiza kontinua hala’o, tanba ne’e kooperasaun entre nasaun rua importante atu promove dezenvolvimentu ekonómiku no responde ba espetativa povu nian.

Nia subliña katak dezenvolvimentu rekursu umanu la’ós de’it haruka joven sira ba universidade atu kontinua estudu, maibé tenke inklui mós mudansa mentalidade hodi motiva sidadaun sira atu partisipa diretamente iha prosesu dezenvolvimentu nasaun.

“Ha’u sempre dehan ba labarik no joven sira katak, keta husu Estadu atu halo saida ka fó saida ba imi. Maibé husu ba imi-nia an rasik katak, imi bele partisipa ho maneira saida iha prosesu dezenvolvimentu ida-ne’e,” nia dehan.

Nia esplika katak Timor-Leste presiza muda mentalidade, hahú kria inisiativa no partisipa ho nakloke liután iha atividade ekonómika atu dezenvolve nasaun.

Iha okaziaun ne’e, Primeiru-Ministru, Kay Rala Xanana Gusmão, mós temi kona-ba movimentu feto emprezária sira ne’ebé prepara ona planu atu hahú dezenvolve empreza mikro, ki’ik no médiu iha tinan oin.

“Governu mós estabelese banku ida ho objetivu atu ajuda no fó apoiu ba feto emprezária sira atu hahú sira-nia atividade negósiu,” Xanana dehan.

Jornalista : Osória Marques

Editór       : Cancio Ximenes

Publisidade

Leave a Reply

Latest Post

error: Content is protected !!