Top

Indonesian Day 2026 hanesan plataforma promosaun ekonómiku no investimentu

Indonesia Day 2026 nu’udar plataforma hodi promove produtu superiór, introdús potensiál ekonómiku no oportunidade investimentu, no enkoraja kooperasaun entre negósiu Indonézia no Timor-Leste. Imajen Tatoli/Dalia Fátima.

DILI, 20 Novembru 2026 (TATOLI)–Indonesian Day 2026 nu’udar plataforma hodi promove produtu superiór, introdús potensiál ekonómiku no oportunidade investimentu, no enkoraja kooperasaun entre negósiu Indonézia no Timor-Leste.

Enkarregadu Negísiu Interinu Embaixada Indonézia iha Dili, Raden Sakunto Paksi, hatete eventu ne’e la’ós de’it selebra amizade entre nasaun rua ne’e liuhosi atuasaun arte no kulturál, maibé ho objetivu mós atu habelar relasaun ekonómika, komérsiu, no investimentu.

“Loron Indonézia hanesan mós plataforma ida hodi introdús poténsia ekonómiku, produtu, no oportunidade investimentu, nune’e mós loke oportunidade ba kolaborasaun entre negósiu sira husi nasaun rua ne’e,” Raden Sakunto Paksi dehan iha konferénsia imprensa iha Embaixada Indonézia Dili, ohin.

Nia esplika, relasaun entre Indonézia ho Timor-Leste harii ona la’ós de’it liuhosi diplomasia Governu-ba-Governu, maibé mós liuhusi forma interasaun komunidade oioin, atividade ekonómika, edukasaun, no kultura.

Tuir nia, relasaun besik ne’e hanesan fundasaun importante ida hodi harii parseria ekonómika ida-ne’ebé envolve setór privadu no povu nasaun rua nian.

“Tinan ida-ne’e, Loron Indonézia Dili 2026 lori tema “Selebrasaun Amizade Entre Indonézia no Timor-Leste liuhosi Kooperasaun Ekonómiku no Kulturál,” nia deklara.

Eventu ne’ebé organiza husi Embaixada Indonézia iha Dili ho kolaborasaun ho Ministériu Kultura Repúblika Indonézia, halo parte iha programa promosaun integradu ne’ebé tau hamutuk diplomasia kulturál, promosaun ekonómika, no hametin relasaun ema ba ema.

Iha setór ekonómiku, Loron Indonézia 2026 sei halibur atór emprezariál oioin no empreza sira Indonézia nian hodi aprezenta sira nia produtu no servisu ba povu Timor-Leste.

Produtu sira ne’ebé promove inklui ai-han no delisia kulinária sira, textil sira, artezanatu sira, batik, no hena tesi sira, ne’ebé reflete kultura riku Indonézia nian no potensiál indústria kriativu Indonézia nian.

Aleinde produtu komérsiu, eventu ida ne’e mós sai hanesan plataforma ida atu hatudu Indonézia nia potensiál iha setór servisu no servisu profisionál.

Envolvimentu empreza sira hosi setór oioin hein atu fó oportunidade ba públiku timoroan no negósiu sira atu aprende kona-ba produtu oioin, kompeténsia sira, no oportunidade sira ba kolaborasaun ho empreza sira Indonézia nian.

Programa promosaun ida ne’e mós komplementa kontribuisaun husi empreza Indonézia sira ba dezenvolvimentu kapasidade rekursu umanu iha Timor-Leste, inklui liu husi atividade formasaun kontabilidade ne’ebé implementa antes ne’e.

Nune’e, Indonézia nia promosaun ekonómika foka la’ós de’it ba komérsiu sasán maibé inklui mós introdusaun servisu profisionál, kapasitasaun, no oportunidade ba kolaborasaun entre setór sira.

Raden Sakunto Paksi subliña importánsia atu hametin relasaun ekonómika sira liuhosi aprosimasaun diplomasia segundu-trasta, ne’ebé envolve interasaun direta entre komunidade sira no atór emprezariál sira.

“Loron Indonézia ne’e ho intensaun prinsipál atu enkoraja promosaun kooperasaun liuhosi diplomasia segunda-trasta, ne’ebé abranje ema-ba-ema, negósiu-ba-emprezáriu, no diplomasia kulturál,” nia esplika.

Nia fiar aprosimasaun ida ne’e bele sai meius ida atu hametin relasaun bilateral liu husi involvimentu direta husi kompania, komunidade, no povu husi nasaun rua ne’e.

Liuhusi espozisaun no promosaun produtu sira, Loron Indonézia 2026 hein atu ajuda habelar konxiénsia kona-ba produtu Indonézia nian, harii rede negósiu sira, habelar oportunidade asesu ba merkadu, no enkoraja kooperasaun ekonómika ne’ebé fó benefísiu ba malu.

Aleinde promosaun ekonómika, Embaixada Indonézia iha Díli mós sai hanesan uma-na’in ba eventu Sinema Kulturál Nusantara, projesaun loron tolu hosi filme indonéziu sira hosi loron 18 to’o 20 fulan-novembru tinan 2026, iha Sentru Kulturál Indonézia nian iha Díli.

Eventu ne’e hanesan parte ida husi Indonézia nia diplomasia públika hodi introdús rikeza arte, kultura, no kreatividade ba povu Timor-Leste.

Entretantu, kulminasaun Loron Indonézia 2026 iha Dili sei akontese iha loron Sábadu (21 Novembru) iha estasionamentu Timor Plaza, hahú tuku 3:00 loraik. oras  Timor-Leste.

Eventu ne’e sei iha aprezentasaun arte no kulturál oioin, bazar kulináriu, espozisaun produtu, no atuasaun hosi kantór indonéziu Wizz Baker no banda Timor-Leste Alcatraz.

Embaixada Indonézia iha Dili hein katak Loron Indonézia sei hametin lasu ekonómiku no kulturál, habelar rede negósiu sira no harii parseria sustentável entre povu no negósiu sira nasaun rua nian.

Jornalista : Felicidade Ximenes

Editór        : Cancio Ximenes

Publisidade

Leave a Reply

Latest Post

error: Content is protected !!