BOBONARU, 28 Jullu 2025 (TATOLI)—Sekretariadu Tékniku Administrasaun Eleitorál (STAE) Delegasaun Territoriál Munisípiu Bobonaru, Segunda ne’e, lansa programa Resensiamentu Eleitorál no Atualizasaun Baze Dadus (REABD) movel hodi prodús kartaun eleitorál ba idozu no Ema ho Defisiénsia (EhD) sira.
Diretór STAE Munisípiu Bobonaru, Mário Viegas Amaral informa lansamentu ne’e hala’o iha suku rua hanesan Bobonaru no Malilait hahú husi Segunda to’o Sesta.
“Ita-nia Munisípiu Bobonaru ha’u deside hahú iha Bobonaru depoiz Segunda oin bá Lolotoe, tuir fali Kailaku, Atabae no Balibó. Ha’u hakarak informa ba ita hotu katak prosesu ne’e ami halo neineik, la’ós atende hotu ba sira-ne’ebé mak kondisaun di’ak hela. Ami-nia prioridade agora ne’e ba maluk sira ho kondisaun defisiénsia ho ita-nia inan-aman sira idozu,” nia hateten iha edifísiu Administrasaun Postu Bobonaru.
Iha biban ne’e, Diretór Komisaun Nasionál Eleisaun Munisípiu Bobonaru, Juvito Ramos reforsa katak programa ne’e sei hala’o fazeadamente iha nivel postu administrativu.
“Kada postu iha loron lima de’it, depoiz ida-ne’e sei muda bá postu seluk. Ne’e primeira faze. segunda faze mós sei mai fali iha-ne’e halo atendimentu hanesan no mós planu STAE nian sei halo rekrutamentu ba ofisiál operadór sistema hodi destaka mai postu administrativu atu halo atendimentu ba ita-nia komunidade,” nia esplika.
Entretantu, Administradór Postu Administrativu Bobonaru, Tomás Barreto Henriques hato’o agradesimentu ba STAE tanba hakbesik ona atendimentu ne’e to’o nivel postu administrativu.
Biban ne’e, Administradór Tomás rekomenda ba STAE atu realiza mós programa REABD movel ne’e iha nivel suku.
“Se bele Postu Bobonaru ne’e halo dala-haat hanesan ne’e. Semana ida fahe ba suku tolu tanba distánsia no ami-nia kondisaun estrada grave. Ida-ne’e oinsá mak ita-nia maluk defisiente sira ne’e bele mai to’o postu,” Tomás konklui.
Enkuantu, daudaun ne’e atendimentu jerál kontinua la’o iha edifísiu STAE Munisípiu Bobonaru.
Jornalista: Sergio da Cruz
Editór: Xisto Freitas da Piedade
